Ռուսաստանին չպետք է անհանգստացնի Ուկրաինային զենքի մատակարարումը. Էրդողանի խորհրդական

Ռուսաստանը չպետք է անհանգստանա Թուրքիայից Ուկրաինա սպառազինության մատակարարումների պատճառով: Այդ մասին ՌԻԱ «Նովոստի»-ին տված հարցազրույցում ասել է Թուրքիայի նախագահի ավագ խորհրդական Մյուջահիթ Քյուչուքյըլմազը:

«Թուրքիան, հարաբերություններ հաստատելով մի երկրի հետ, խնդիրներ չի ստեղծում մյուսի հետ հարաբերություններում: Մենք խնձորն առանձնացնում ենք տանձից: Թուրքիան ունի միաժամանակ տարբեր երկրների հետ բազմաչափ շփումներ և հարաբերություններ պահպանելու ունակություն և դիվանագիտական հմտություններ: Մենք կշարունակենք հարաբերություններ կառուցել տարբեր երկրների հետ`ըստ մեր կարիքների և հետաքրքրությունների: Այս առումով՝ մեր դաշնակիցները, ընկերները և նրանք, ում հետ մենք համագործակցում ենք, չպետք է անհանգստանան»,- ասել է նա:

Ապրիլի սկզբին թուրքական անօդաչու թռչող սարքերի՝ Bayraktar-ների արտադրողը հայտնել է, որ Ուկրաինան արդեն գնել է իրենց համալիրները: Մոսկվան նշել է, որ դա ուրախություն չի պատճառում, սակայն Թուրքիայի արտգործնախարար Մևլյութ Չավուշօղլուն վստահեցրել է, որ գործարքն ուղղված չէ Ռուսաստանի դեմ:

Միաժամանակ, Ուկրաինայի ԱԳՆ ղեկավար Դմիտրի Կուլեբան ասել է, որ «Ուկրաինայի վրա լայնամասշտաբ հարձակման» դեպքում Ռուսաստանը զսպելու համար անօդաչու թռչող սարքեր են անհրաժեշտ: Դրան Պետդումայի պատգամավոր Ռուսլան Բալբեկը պատասխանել է, որ «Բայրաքթար»-ը նման են «բարակ ծղոտի», որով անխոհեմ է վախեցնել ռուսական բանակին:

Կիևը նաև համագործակցում է Անկարայի հետ նավերի ստեղծման հարցում: Ուկրաինայի նախագահ Վլադիմիր Զելենսկիի խոսքով՝ Թուրքիայում ռազմանավ է կառուցվում, որը նախատեսվում է ավարտին հասցնել ուկրաինական նավաշինարանում մինչև 2023 թվականի վերջը: Ըստ փորձագետների՝ խոսքը «Ադա» դասի կորվետների մասին է: Թուրքիայի ռազմածովային ուժերն այժմ ունեն այս նախագծի չորս նավ: