ԶՈՒ զենքի մատակարարումը չի սկսվել ու ավարտվել միայն ռուսական վարկով

Դեռ տարեսկզբին պարզ դարձավ, որ Ռուսաստանը Հայաստանին 200 մլն դոլարի վարկ է հատկացրել` զենք գնելու համար: Այսօր` լրագրողների հետ հանդիպման ժամանակ, ՀՀ պաշտպանության նախարարի մամուլի խոսնակ Արծրուն Հովհաննիսյանը նշեց, որ զենքի մատակարարման գործընթացը վաղուց է սկսված, բայց թե ինչ է մատակարարվել և որքան, չի կարող ասել:

«ՀՀ զինված ուժերի` նոր զինտեխնիկայով համալրման ծրագիրը կապ չունի միայն ռուսական վարկի հետ, այն չի սկսվել միայն վարկով և չի ավարտվում վարկով: Դեռ տարիներ առաջ հայտարարվել էր, որ ՀՀ-ն պլանային կերպով անցնում է իր բանակի վերազինմանը: Պետք է ասեմ, որ մեր զինանոցում կան զենքեր, որոնք շատ լավն են ու կարևոր, անգամ` երազելի զենքեր են: Այդ վարկի շրջանակներում ե՞րբ կլինի ամբողջ զինանոցի մատակարարումը, գաղտնիք է, իրավունք չունեմ ասելու, բայց զենք-զինամթերքի համալրումը չընդհատվող, մշտական գործընթաց է»,- ասաց Հովհաննիսյանը:

Հարցին, թե ՀՀ ԶՈՒ-ն ունի՞ զինատեսակների կարիք, որոնք ուզում է գնել, բայց ՌԴ-ն չի համաձայնում դրանք վաճառել հայկական կողմին, պատասխանեց, որ չի կարծում, թե կան զինատեսակներ, որոնք մեզ անհրաժեշտ են և դրանց վաճառքի հետ կապված ռուսական կողմից մերժում ենք ստացել:

Անդրադառնալով ՀՀ նախագահ Սերժ Սարգսյանի խոսքին, թե մենք կռվում ենք 80-ականների զենքով, Հովհաննիսյանը նշեց, որ ցանկացած մարդու խոսք, հատկապես` բարձրաստիճան պաշտոնյայի, կարելի է մեկնաբանել ցանկացած ձևով: «Ցավոք, այդպես էլ կատարվում է: Այո, ասեմ նաև, որ 60-ականների զենքով էլ ենք հաղթանակ տանում. «Գրադ» համակարգի զենքը 60-ականների է: Ավելին` մեր զինանոցում կան տասնյակ նմուշներ, որոնք 40-50-ականների են, բայց իրենց խնդիրը հստակ են կատարում: Ռուսական զինանոցում եղած զենքերը հատկապես 80-ականների զենքեր են` «Սմերչը», «Տոսը»: 80-ականների զենք` չի նշանակում անպայմանորեն հին զենք»,- ասաց նա: