Դեռևս չի նախատեսվում «Թալիբան» շարժումը բացառել արգելված կազմակերպությունների ցուցակից. Պեսկով

Ռուսաստանը դեռ չի նախատեսում բացառել «Թալիբան» շարժումը արգելված կազմակերպությունների ցուցակից։ Այս մասին ասել է Ռուսաստանի Դաշնության նախագահի մամուլի քարտուղար Դմիտրի Պեսկովը՝ պատասխանելով լրագրողների` նման հեռանկարի վերաբերյալ հարցին:

Հարցը կապված էր Ռուսաստանի արտգործնախարար Սերգեյ Լավրովի հայտարարության հետ, ըստ որի` Ռուսաստանը ջանքեր կգործադրի «Թալիբան»-ի և Աֆղանստանի կառավարության միջև երկխոսություն հաստատելու համար, քանի որ կարգավորումն այս երկրում պահանջում է բոլոր քաղաքական և էթնիկ խմբերի մասնակցություն:

Լրագրողը հարցրել է, թե արդյո՞ք պետության ղեկավարը նախատեսում է առաջարկել Ռուսաստանի Դաշնությունում արգելված կազմակերպությունների ցուցակից հանել շարժումը: «Առայժմ այս հարցում նորություններ չկան: Եթե դրանք լինեն, մենք ձեզ կտեղեկացնենք», - պատասխանել է Պեսկովը:

Մեկնաբանելով Լավրովի հայտարարությունը՝ նա նշել է, որ համաձայն է, որ «Թալիբան» շարժումը «բավական շոշափելի և հզոր ուժ է, որը գործում է Աֆղանստանում»: