ԱՄՆ-ը Բայդենի օրոք առաջին օդային հարվածն է հասցրել Սոմալիում ահաբեկչական խմբավորմանը

ԱՄՆ պաշտպանության նախարարությունը հայտարարել է Սոմալիում ահաբեկիչներին ավիահարված հասցնելու մասին:

«Բայդենի երդման արարողությունից հետո առաջին անգամ ԱՄՆ-ը հարվածներ է հասցրել իսլամիստներին Սոմալիում»,- հայտնում է Agence France-Presse- ը՝ վկայակոչելով Պենտագոնի խոսնակ Սինդի Քինգին:

«Հրամանատարության նախնական գնահատման համաձայն՝  ավիահարվածի արդյունքում ոչ մի քաղաքացի չի տուժել կամ զոհվել»,- ասել է Քինգը:

Ըստ Պենտագոնի խոսնակի՝ ԱՄՆ զինված ուժերի աֆրիկյան հրամանատարությունը (AFRICOM) դեռ չի կարող հստակեցնել, թե որքան վնաս է հասցվել «Ալ Շաբաբ» ահաբեկչական խմբավորմանը, քանի որ մարտերը շարունակվում են զինյալների և իշխանամետ ուժերի միջև:

Ավելի վաղ հաղորդվել էր, որ Սոմալիում վեց մարդ է զոհվել երկրի մայրաքաղաք Մոգադիշոյում տեղի ունեցած պայթյունի հետևանքով:

Դրանից առաջ երկրում կառավարական ուժերը ոչնչացրել էին «Ալ Շաբաբ» խմբավորման 16 գրոհային: Զորքերն ազատել են նաև 40 երեխաների Ստորին Շաբելե շրջանում: Այս խումբը 2008 թվականից փորձում է տապալել օրինական կառավարությունը Սոմալիում: