Թուրքիային դուր չի եկել Սիրիայի քրդերի ներկայացուցիչների հետ Մակրոնի հանդիպումը

Թուրքիան դատապարտում է Ֆրանսիայի նախագահ Էմանուել Մակրոնի հանդիպումը, այսպես կոչված, Սիրիայի ժողովրդավարական խորհրդի անդամների հետ, որը վերահսկվում է YPG-ի կողմից (PKK-ի սիրիական մասնաճյուղի՝ PYD-ի զինյալ թև)․ ասվում է Թուրքիայի ԱԳՆ մամուլի քարտուղար Թանժու Բիլգիչի գրավոր հայտարարության մեջ:

«Այն շփումները, որոնք Փարիզը, հակառակ Անկարայի կոչերին, վարում է այս արյունալի ահաբեկչական կազմակերպության և դրա մասնաճյուղերի հետ`անջատողական ծրագրերով, խաթարում են Թուրքիայի ջանքերը` ուղղված իր ազգային անվտանգությունը, ինչպես նաև Սիրիայի քաղաքական միասնությունն ու տարածքային ամբողջականությունը պաշտպանելուն և կայունությունը երկրում ապահովելուն»,- շեշտել է Բիլգիչը:

Ըստ Թուրքիայի արտգործնախարարության խոսնակի՝ Անկարան բազմիցս հիշեցրել է ֆրանսիական և միջազգային հանրությանը «PKK-ի հանցագործությունների մասին»։

«Եվս մեկ անգամ կրկնում ենք, որ Թուրքիան վճռականորեն շարունակելու է պայքարն այս ահաբեկչական կազմակերպության և դրա մասնաճյուղերի դեմ ամենուր»,- ավելացրել է Թուրքիայի ԱԳՆ խոսնակը: