Բաքուն և Թբիլիսին դարձել են քույր քաղաքներ

Թբիլիսին և Բաքուն դարձել են թույր քաղաքներ։ Այս մասին հայտնի է դարձել Թբիլիսիի քաղաքապետ Կախա Կալաձեի՝ Բաքու կատարած այցի ընթացքում, որտեղ նա հանդիպել է այդ քաղաքի գործադիր իշխանության ղեկավար Էլդար Ազիզովի հետ։

Ողջունելով հյուրերին՝ Ազիզովը նշել է, որ երկու երկրների միջեւ կան երկարամյա բարեկամական և բարիդրացիական հարաբերություններ:

Ընդգծելով, որ ադրբեջանա-վրացական հարաբերությունները հասել են ռազմավարական գործընկերության մակարդակի, Ազիզովն ասել է. «Այսօր Ադրբեջանի և Վրաստանի միջև հարաբերությունները զարգանում են շատ ոլորտներում: Փոխադարձ այցելությունները նոր հնարավորություններ են ստեղծում մեր հարաբերությունների հետագա զարգացման համար»:

Նշելով, որ ադրբեջանցի և վրացի ժողովուրդները դարեր շարունակ ապրել են խաղաղության և բարեկամության մեջ, Թբիլիսիի քաղաքապետ Կախա Կալաձեն ասել է, որ իր երկիրը հատուկ նշանակություն է տալիս Ադրբեջանի հետ հարաբերություններին:

Այնուհետև Բաքվի և Թբիլիսիի միջև ստորագրվել է «եղբայրության» հուշագիր: