ԱՄՆ պետդեպը չի բացառում պատժամիջոցների կիրառումը Վրաստանում ԼԳԲՏ անձանց հակառակորդների կողմից բռնությունների պատճառով

Վաշինգտոնը Վրաստանի իշխանություններին կոչ է անում հետաքննել հանրապետությունում ԼԳԲՏ անձանց հակառակորդների կողմից բռնության գործադրումը և չի բացառում պատժամիջոցների կիրառումը: Այսպես՝ Պետդեպարտամենտի մամուլի ծառայության ղեկավար Նեդ Փրայսը երեքշաբթի կայացած ճեպազրույցում արձագանքել է լրագրողի խնդրանքին` մեկնաբանել ԱՄՆ Կոնգրեսում վրաց պաշտոնյաների նկատմամբ անձնական սահմանափակումներ մտցնելու հնարավորության մասին քննարկումները:

«Մենք ունենք մի շարք գործիքներ, որպեսզի պատասխանատվության ենթարկվեն աշխարհում մարդու իրավունքների ոտնահարման, բռնության մեջ ներգրավված անձինք: Պատժամիջոցները, իհարկե, այդպիսի գործիքներից են: Դուք գիտեք, որ մենք պատժամիջոցներ չենք հայտարարում նախքան դրանց կիրառումը, մենք շատ լրջորեն վերահսկում ենք իրավիճակը»,- ասել է նա:

«Ինչ վերաբերում է Վրաստանում գործող բոլոր քաղաքական դերակատարներին, մենք նրանց կոչ ենք անում դատապարտել այս բռնությունը: Մենք կրկնում ենք Վրաստանի կառավարությանն ուղղված՝ հետաքննություն անցկացնելու կոչը, որպեսզի հարձակվողները պատասխանատվության ենթարկվեն»,- ասել է Փրայսը:

Ըստ խոսնակի՝ յուրաքանչյուր վրացի լրագրողի անվտանգությունը և ժողովրդավարության ապահովումը պահանջում են, որ նրանք, ովքեր հարձակվել են խաղաղ ցուցարարների և ԶԼՄ-ների վրա, «հայտնաբերվեն, ձերբակալվեն և պատժվեն օրենքի ողջ խստությամբ»: «Մենք Վրաստանի ղեկավարներին և իրավապահ մարմիններին հիշեցնում ենք իրենց սահմանադրական իրավունքներն իրականացնելիս քաղաքացիներին պաշտպանելու պատասխանատվությունը»,- ասել է Փրայսը: