Զելենսկին հայտարարել է, որ Թուրքիան Ուկրաինայի համար կառուցելու է կորվետ և Բայրաքթարներ

Ուկրաինայի զինված ուժերը Թուրքիայից նոր զենք կստանան: Այս մասին ասել է Ուկրաինայի նախագահ Վլադիմիր Զելենսկին՝ ելույթ ունենալով երկրի ռազմածովային ուժերի առջև. հաղորդում է «Ինտերֆաքս»-ը:

Նրա խոսքով՝ շուտով զինվորականները կստանան թուրքական Bayraktar-TB2 հարձակողական անօդաչու թռչող սարքեր, ուկրաինացի մասնագետներն արդեն Թուրքիայում ավարտում են դասընթացները, թե ինչպես դրանք գործարկել:

Բացի այդ, մինչև 2023 թվականը թուրք մասնագետները Ուկրաինայի համար կկառուցեն ժամանակակից կորվետ: Ռազմանավն արդեն դրված է նավաշինարանում:

Ուկրաինան սկսել է բանակցություններ վարել Bayraktar անօդաչու թռչող ապարատների մեծ գնումների մասին դեռ 2020-ի ամռանը, մինչև թուրքական զենքը լայնորեն օգտագործվեր Ադրբեջանի կողմից Լեռնային Ղարաբաղում ռազմական գործողությունների ընթացքում: 2021 թվականի ապրիլին Կիևն առաջին անգամ օգտագործեց անօդաչու թռչող սարք, որը բանակում գտնվում էր 2019 թվականից, Դոնբասում ռազմական գործողությունների գոտում՝  «դիտարկման նպատակով»:

Ուկրաինայի արտաքին գործերի նախարար Դմիտրի Կուլեբան հայտարարել է, որ թուրքական Bayraktar անօդաչու սարքերը երկրին անհրաժեշտ են Ռուսաստանի «զսպելու» համար: