Բաքուն պահանջում է Հայաստանին «պատասխանատվության ենթարկել» սահմանային գետերի աղտոտման համար

Հայաստանի տարածքում գտնվող պղնձամոլիբդենային գործարանը հում արտադրական թափոնները թափում է Ողջի (բնօրինակում՝ Օխչուչայ) գետը: Սա լայնածավալ խնդիր է, քանի որ Ողջին հոսում է դեպի Արաքս գետը: Այս մասին, ըստ Trend-ի, Բաքվում Ղրղզստանի արտգործնախարար Ռուսլան Կազակբաևի հետ համատեղ մամուլի ասուլիսում ասել է Ադրբեջանի արտգործնախարար Ջեյհուն Բայրամովը։

Ըստ ադրբեջանցի նախարարի՝ սա խնդիր է ստեղծում ոչ միայն Ադրբեջանի, այլ նաև Իրանի համար:

«Ադրբեջանը պահանջում է լուրջ արձագանքել այս հարցին: Հայաստանը չի կարողանա խուսափել պատասխանատվությունից: Միևնույն ժամանակ, մենք դիմում ենք Հայաստանում գործող օտարերկրյա ընկերություններին` պահանջելով նրանց արդյունավետ միջոցներ ձեռնարկել այդ կապակցությամբ»,- ասել է Ադրբեջանի արտաքին գործերի նախարարը: