Վրաստանը կդիմի ԵՄ լիիրավ անդամակցության համար

Վրաստանը նախատեսում է դիմել Եվրամիությանը մինչև 2024 թվականը լիիրավ անդամակցության համար, իսկ Ասոցացման համաձայնագիրը կատարել 60-65%-ով. նշվում է Վրաստանի ԱԳՆ հայտարարության մեջ։

Ըստ հայտարարության՝ Համաձայնագրի ստորագրումից յոթ տարի անց երկիրը զգալի առաջընթաց է գրանցել ԵՄ-ի հետ ինտեգրման գործընթացում` շոշափելի արդյունքներով և օրենսդրական ու ինստիտուցիոնալ մակարդակներում ԵՄ ստանդարտներին մոտեցմամբ:

«Եվրամիության հետ Ասոցացման համաձայնագիրը, որը ներառում է ազատ առևտուր, նոր խթան հաղորդեց Վրաստանի և ԵՄ-ի միջև առևտրատնտեսական հարաբերությունների զարգացմանը, ներառյալ՝ Վրաստանից ազգային ապրանքների արտահանման աճին (15%), Եվրամիությունը դարձավ Վրաստանի հիմնական առևտրային գործընկերը (24%)»,- ասվում է հայտարարության մեջ:

Համաձայնագիրը նաև նպաստել է Վրաստանում ներդրումների մթնոլորտի բարելավմանը՝ ներդրումների և արտադրության միջոցով: Արտադրողներն այժմ կարող են առանց մաքսային սակագների իրենց արտադրանքն արտահանել ԵՄ շուկա: ԵՄ-ի հետ էներգետիկ համագործակցությունը նույնպես հասել է զարգացման նոր մակարդակի. 2016-ին Վրաստանը միացավ Եվրոպական էներգետիկ միությանը:

ԵՄ-ի օգնությունը Վրաստանին զգալիորեն ավելացել է. վերջին յոթ տարիների ընթացքում գումարը գերազանցել է 1 միլիարդ եվրոն: Ըստ համաձայնագրի՝ ԵՄ ֆինանսական օժանդակության ծավալն աստիճանաբար աճում է, որը տարեկան կազմում է 120-130 միլիոն եվրո միայն երկկողմ ձևաչափով, և Վրաստանը լրացուցիչ մասնակցում է տարածաշրջանային աջակցության տարբեր ծրագրերին բազմակողմ ձևաչափով: