Լավրովը չի շտապում գնահատել, թե ինչպես կանդրադառնան Հայաստանի ընտրությունները Ղարաբաղում տիրող իրավիճակի վրա

Դեռ վաղ է գնահատել Հայաստանում խորհրդարանական ընտրությունների արդյունքների ազդեցությունը Ղարաբաղում տիրող իրավիճակի վրա: Այդ մասին հայտարարել է Ռուսաստանի արտգործնախարար Սերգեյ Լավրովը:

«Ընտրությունները նոր են տեղի ունեցել: Դեռ պարզ չէ, թե ինչպես են այս արդյունքները ազդելու քաղաքական կյանքի ձևավորման վրա նոր պայմաններում։ Սպասենք, մինչև կառավարություն կլինի այնտեղ»,-  ասել է նա երկուշաբթի Մոսկվայում կայացած մամուլի ասուլիսում:

Ըստ նախարարի՝ «մենք, համենայն դեպս, ելնում ենք նրանից, որ պատերազմը դադարեցրած եռակողմ պայմանագիրը, ինչպես նաև երկրորդ եռակողմ համաձայնագիրը, որով մեկնարկել է տնտեսական ամբողջ գործունեության ձևավորման և շրջափակումը վերացնելու հատուկ ձևերի համաձայնեցման գործընթացը, աշխատում են և համապատասխանում ներգրավված բոլոր կողմերի շահերին»: