Վճռորոշ ընտրութիւններ Իրանում եւ Հայաստանում...

Վաղն՝ Իրանում, իսկ երեք օր անց հարեւան ու բարեկամական Հայաստանում վճռորոշ ընտրութիւններ են կայանալու:

Իրանում համապետական մասշտաբով ընտրւելու է նոր նախագահ՝ նոր կառավարութեան ձեւաւորմամբ, իսկ Հայաստանում եւս թէեւ համապետական, բայց արտահերթ կերպով, պէտք է ձեւաւորւի նոր խորհրդարան՝ Ազգային ժողով, յետպատերազմական եօթամսեայ նոյնչափ արտակարգ ներ-քաղաքական ու արտաքին քաղաքականութեան ու յատկապէս անվտանգութեան պայմաններում:

Իրանի դէպքում ձեւաւորւելիք նոր կառավարութիւնը պէտք է յաղթահարի բազմաշերտ դժւարութիւններ՝ թէ՛ ներքին սոցիալ-տնտեսական անմխիթար պայմաններից բխող իրավիճակը, եւ թէ՛ արտաքին ինչպէս քաղաքական, այնպէս էլ յատկապէս անվտանգութեանը վերաբերող պայմանների ներուժ ու ներգործօն սպառնալիքները:

ՀՀ-ում եւս գրեթէ նոյն սպառնալիքներն են թէ՛ ներքին, եւ թէ՛ յատկապէս արտաքին ճակատում, երբ ուղղակիօրէն դրւած է երկրի ինքնիշխանութեան եւ հողային ամբողջականութեան վերականգնման ու դրանք արժանապատւօրէն պահպանելու անյետաձգելի հանգամանքները:

Երկու հարեւան ու հինաւուրց երկրների համար անվտանգութեան ոլորտում առաջացած նոր պայմանները՝ Արցախեան պատերազմից յետոյ, գրեթէ նոյն մարտահրաւէրներն են ուրւագծել, կապւած՝ պան-թուրքական նոր ծաւալապաշտութեան հետ:

Յուսանք երկու հարեւան ու բարեկամ երկրներում առաջիկայում կայանալիք վճռորոշ ընտրութիւնների արդիւնքում ձեւաւորւելիք նոր իշխանութիւններն ու կառավարութիւնները երկու երկրների համատեղ շահերից բխող քաղաքականութեան որդեգրմամբ կապահովեն ինչպէս սեփական, այնպէս էլ տարածաշրջանի անվտանգութեանը սպառնացող թուրք-թաթարական նորօրեայ դաշինքն ու ծաւալապաշտութիւնը:

«ԱԼԻՔ» ՕՐԱԹԵՐԹԻ ԳԼԽԱՒՈՐ

ԽՄԲԱԳԻՐ ԴԵՐԵՆԻԿ ՄԵԼԻՔԵԱՆ