Սաուդյան Արաբիան արաբական մի քանի երկրների հետ համատեղ օդային վարժանքներ է իրականացնում

Սաուդյան Արաբիան արաբական մի քանի երկրների հետ համատեղ օդային վարժանքներ է անցկացնում «Արքայազն Սուլթան» ավիաբազայում, հայտնել է MEM-ը:

Երկշաբաթյա վարժանքը, որը կրում է «Tuwaiq 2» անվանումը, «նպատակ ունի ապահովել պատրաստվածության բարձրագույն մակարդակ եւ հասնել գործողությունների համատեղելիության եւ ինտեգրման», - հայտարարել է երկրի պաշտպանության նախարարությունը:

Մասնակից երկրներն են ԱՄԷ-ն, Օմանը, Հորդանանն ու Եգիպտոսը, իսկ Քուվեյթն ու Բահրեյնը մասնակցում են որպես դիտորդներ:

Վարժանքների հրամանատար, փոխգնդապետ Մուհամմադ Իբրահիմ Բեն Սուֆյանը հայտնել է, որ զորավարժությունները անցկացվելու են մի քանի փուլով՝ ներառյալ թռիչքների պլանավորումը եւ իրականացումը:  

Սաուդյան Արաբիայի ռազմաօդային ուժերը անցյալ շաբաթ Հունաստանի ռազմաօդային ուժերի հետ նման զորավարժություններ են անցկացրել Թաբուք քաղաքում գտնվող Ֆեյսալ թագավորի ավիաբազայում: «Falcon Eye 2» անվանումը ստացած երկշաբաթյա վարժանքը երկրների միջեւ երկկողմ կապերի շարունակական ամրապնդմանն է ուղղված, հատկապես ռազմական համագործակցության առումով, քանի որ երկու երկրներն էլ կիսում են Թուրքիայի արտաքին քաղաքականության հետ կապված մտահոգությունները: