Զելենսկին Մոսկվայում չի հանդիպի Պուտինի հետ. Ուկրաինայի փոխվարչապետ

Ուկրաինայի նախագահ Վլադիմիր Զելենսկին չի մեկնի Մոսկվա՝ բանակցելու Ռուսաստանի առաջնորդ Վլադիմիր Պուտինի հետ: Այս մասին հայտարարել է Ուկրաինայի փոխվարչապետ, Դոնբասի շփման խմբի կիևյան պատվիրակության ղեկավարի տեղակալ Ալեքսեյ Ռեզնիկովը:

Կիևը Ռուսաստանը պաշտոնապես համարում է «ագրեսոր երկիր» և պնդում, որ Դոնբասում կան ռուսական զորքեր: Ռեզնիկովի խոսքով՝ Զելենսկին կարող է Պուտինի հետ խոսել առաջին հերթին Դոնբասում պատերազմի ավարտի, ապա հետո միայն երկկողմ հարաբերությունների վերականգնման մասին: Բայց այդպիսի հանդիպում, ըստ նրա, չի կարող տեղի ունենալ Մոսկվայում:

«Պատերազմի տարիներին մայրաքաղաք մեկնել՝ ագրեսոր երկրի ներկայացուցիչ հանդիսացող անձի հետ հանդիպելու, դա ինձ թվում է բավականին տարօրինակ առաջարկ»,- ասել է Ուկրաինայի փոխվարչապետը:

Նրա կարծիքով՝ եթե նման հանդիպում տեղի ունենա, ապա այն պետք է տեղի ունենա «Նորմանդական ձևաչափով»՝ Գերմանիայի և Ֆրանսիայի ղեկավարների մասնակցությամբ:

Հիշեցնենք, որ Պուտինի հետ հանդիպելու պատրաստակամության մասին հայտնել է Զելենսկին, բայց՝ Դոնբասում։ Դրանից հետո ՌԴ նախագահը նույնպես հայտնել էր, որ պատրաստ է հանդիպման՝ Մոսկվայում։