Ռուսաստանում սկսվել են բանակի մարտունակության ստուգումներ

Ռուսաստանը սկսել է ստուգել երկրի զինված ուժերի մարտական պատրաստությունը: РИА Новости-ի հաղորդմամբ՝ այս մասին հայտարարել է ՌԴ ՊՆ ղեկավար Սերգեյ Շոյգուն:

«Զինված ուժերի ուսումնական պլանին համապատասխան, վերահսկողական ստուգումներ են սկսվել ռազմական հրամանատարության և վերահսկողության մարմիններում և զորամասերում: Զորքերը մեկնել են ուսումնավարժանքների՝ մարտավարական, մարտավարական-հատուկ և երկկողմ վարժանքներ անցկացնելու»,- ասաց նախարարը:

Ընդհանուր առմամբ, ապրիլին ռուսաստանցի զինվորականները կանցկացնեն տարբեր մասշտաբների ավելի քան 4000 վարժանք, այդ թվում՝ 812՝ երկկողմանի, 101՝ ուսումնական զորավարժարաններում և 520՝ ուսումնական հաստատությունում. գործակալությանը հայտնել են պաշտպանության նախարարությունից:

Զորավարժությունները տեղի կունենան բոլոր ռազմական շրջաններում և Հյուսիսային նավատորմի տարածքում, ինչպես նաև Հեռավոր Հյուսիսում, Կուրիլյան կղզիներում և Կամչատկայում: Ստուգումը կվերաբերի զինված ուժերի բոլոր տեսակներին և ճյուղերին: