ԱՄՆ-ը չի մասնակցի 5+1 բանակցություններին. Իրան

Իրանի խորհրդարանի ազգային անվտանգության և արտաքին քաղաքականության հանձնաժողովի խոսնակ Աբոլֆազ Ամուեյը հայտարարել է, որ քանի դեռ գործնականում չեն չեղարկվել երկրի դեմ ԱՄՆ պատժամիջոցները, Իրանը չի վերադառնա JCPOA-ի լիակատար իրագործմանը, իսկ ԱՄՆ-ը չի մասնակցի բանակցային գործընթացին՝ 5 + 1 ձևաչափով: Այս մասին հայտնում է իրանական IRNA գործակալությունը:

Իրանի փոխարտգործնախարար Աբաս Արաղչին խորհրդարանականներին տեղեկացրել է հանձնաժողովի նիստերում ԱՄՆ–ի՝ միջուկային գործարքին միանալու վերաբերյալ ընթացող բանակցությունների մասին:

Ճեպազրույցից հետո՝ նիստի ընթացքում, Ամուեյը  լրագրողներին ասել է Արաղչիի այն հայտարարության մասին, որ Իրանն ուղղակի կամ անուղղակի բանակցություններ չի վարելու ԱՄՆ-ի հետ JCPOA համատեղ հանձնաժողովի հաջորդ հանդիպումների ժամանակ, որոնք նախատեսված են ապրիլի 6-ին Վիեննայում:

Ամուեյը շեշտել է, որ Իրանի Իսլամական Հանրապետությունը չի ճանաչում ԱՄՆ-ին որպես JCPOA-ի կողմ, քանի որ դադարեցրել է իր մասնակցությունը 2018-ին և վերսկսել պատժամիջոցների կիրառումը: