Ադրբեջանը հայտարարել է Երևանի կողմից «Իսկանդեր»-ի կիրառման մասին

Ադրբեջանի ականազերծման գործակալության (ANAMA) ներկայացուցիչը Caliber.az-ին տված հարցազրույցում հայտարարել է, որ Հայաստանը Ադրբեջանի դեմ կիրառել է «Իսկանդեր» հրթիռային համակարգը:

Նա ասել է, որ 2020 թվականի դեկտեմբերից Շուշի քաղաքում ականազերծման գործակալությունը աշխատանքներ է իրականացնում ականազերծման և զինամթերքի վերացման ուղղությամբ: 2021 թվականի մարտի 15-ին քաղաքում տարածքների մաքրման գործողության ընթացքում հայտնաբերվել են երկու պայթած հրթիռների բեկորներ: Փորձաքննության արդյունքները ցույց են տվել, որ դրանք «Իսկանդեր»-ի բեկորներն են`9M723 նույնականացման համարով:

Ըստ նրա՝ հրթիռների բեկորների աշխարհագրական կոորդինատները հետևյալն են` 39 ° 45'38.10 "N 46 ° 44'33.90" E և 39 ° 45'27.80 "N 46 ° 45'25.80" E.

Ավելի վաղ Ադրբեջանի նախագահ Իլհամ Ալիևը հայտարարել էր, որ Հայաստանը պատերազմի ընթացքում չի կիրառել «Իսկանդեր»-ը: Դա հաստատել էր նաև Ռուսաստանի պաշտպանության նախարարությունը, որը պարզաբանումներով հանդես եկավ «Իսկանդերի» մասին Նիկոլ Փաշինյանի սկանդալային հայտարարությունից հետո:

ՀՀ ԶՈՒ բարձրագույն սպայակազմն իր հերթին հայտարարել էր «Իսկանդերներով» կրակելու մասին։