Ծիտ Նանոյին «հանձնարարողը» ՔՊ-ական Սերոբ Սարգսյանն է

Այսօր մի տեսանյութ տարածվեց, որում իբրև թե ընդդիմադիր մեկը զանգահարում է Ծիտ Նանո անունով մեկին, որը խոստանում է հերթական անգամ գալ ակցիայի վայր և մի զույգ կոշիկի դիմաց գոռալ «Նիկոլ դավաճան», իսկ երեկոյան էլ՝ «Վազգեն վարչապետ»:

Իշխանությունների՝ վարչական ռեսուրսների ակտիվ կիրառման մասին վկայող երեկվա զանգերի հետևանքով խայտառակված իշխանությունը, ինչպես միշտ, փորձում է ինքնապաշտպանվել և, ինչպես բոլոր դեպքերում, դա այն աստիճան անգրագետ ու փողոցայինին հատուկ ոճով է իրականացնում, որ աչքը շինելու տեղն ունքն էլ է փչացնում:

Yerkir.am-ը փաստում է՝ կոնկրետ այս դեպքում զանգահարող տղամարդն Աջափնյակի Նորաշեն թաղամասի 21-րդ շենքի բնակիչ, «Քաղաքացիական պայմանագիր» կուսակցության կարկառուն ներկայացուցիչ Սերոբ Սարգսյանն է:

Քայլարածների, ավելի կոնկրետ՝ Աջափնյակ վարչական շրջանի նախկին ղեկավար Գևորգ Բաբայանի (Բալգարչիկ Գևոր) հետ կապերի սերտացման արդյունքում այս երիտասարդը 2018-ի իշխանափոխությունից հետո աշխատանքի անցավ նույն վարչական շրջանի աշխատակազմի քաղաքաշինության և հողօգտագործման բաժնում: Այստեղ Սերոբ Սարգսյանը երկար չմնաց. նա որոշ ժամանակ անց աշխատանքից ստիպված էր հեռանալ, քանի որ Բալգարչիկ Գևորը որոշել էր աշխատակիցների կրճատման, իսկ իրականում՝ «հներից ազատման» օպերացիա իրականացնել: Ահա այդ «բալգարչիկավարի» իրականացված օպերացիայի արդյունքում «զոհաբերվեց» նաև Բաբայանի թիմակից Սերոբ Սարգսյանը:  

Ինչևէ: Այսօրվա «կոնտրօպերացիայով» ՔՊ-ական Սերոբ Սարգսյանը ցույց տվեց, որ այդ Ծիտ Նանոն ոչ այլ ոք է, քան իր մակարդակի մեկը, մի «ծիտ», որի հետ որոշել էին ցուցադրել այդ անգրագետ բեմականացումը: