Լավրովն ու Չավուշօղլուն քննարկել են իրավիճակը Լեռնային Ղարաբաղում

Ռուսաստանի և Թուրքիայի արտաքին գործերի նախարարներ Սերգեյ Լավրովը և Մևլյութ Չավուշօղլուն հեռախոսազրույց են ունեցել երկու երկրների նախագահներ Վլադիմիր Պուտինի և Ռեջեփ Թայիփ Էրդողանի բանակցություններում ավելի վաղ արծարծված թեմաների շուրջ։ Աայս մասին, ըստ «ՌԻԱ Նովոստի»-ի, հայտնել է Թուրքիայի ԱԳՆ-ի աղբյուրը:

«Մեր նախարարը բանակցություններ է վարել իր ռուս գործընկեր Սերգեյ Լավրովի հետ: Կողմերը քննարկել են այսօր մեր նախագահի և Վլադիմիր Պուտինի հեռախոսազրույցում բարձրացված թեմաները և պայմանավորվել են դրանք վերահսկել»,- ասել է գործակալության աղբյուրը:

Ավելի վաղ Կրեմլի մամուլի ծառայությունը հաղորդել էր, որ Պուտինը և Էրդողանը քննարկել են իրավիճակը Լեռնային Ղարաբաղի շուրջ, ներառյալ՝ Ռուսաստանի Դաշնության և Թուրքիայի գործողությունների համակարգումը տարածաշրջանի սոցիալ-տնտեսական զարգացման գործում, և ընդգծել իրենց տրամադրվածությունը էներգետիկայի ոլորտում խոշոր  նախագծերի իրականացման վերաբերյալ:

Էրդողանը Պուտինի հետ բանակցությունների ընթացքում քննարկել է Լեռնային Ղարաբաղում հրադադարի ռեժիմի պահպանումը դիտարկելու համար համատեղ կենտրոնի գործունեությունը, ինչպես նաև Սիրիայում և Լիբիայում կարգավորման գործընթացը: Էրդողանը նշել է, որ թուրք և ռուս փորձագետները կարող են հանդիպել իրենց ադրբեջանցի գործընկերների հետ` Ղարաբաղում տրանսպորտային ուղիներն ավելի արդյունավետ օգտագործելու համար: