Լավրովը եւ Այվազյանը քննարկել են Ղարաբաղի վերաբերյալ համաձայնագրերի իրականացման ընթացքը

Փետրվարի 17-ին Ռուսաստանի ԱԳ նախարար Սերգեյ Լավրովի հրավերով կարճատեւ աշխատանքային այցով Ռուսաստանի Դաշնություն է այցելել Հայաստանի Հանրապետության արտգործնախարար Արա Այվազյանը․ հայտնում է ՌԴ ԱԳՆ-ն:

Հանգամանալից քննարկում է տեղի ունեցել Ռուսաստանի, Ադրբեջանի եւ Հայաստանի ղեկավարների՝ 2020 թվականի նոյեմբերի 9-ի եւ 2021 թվականի հունվարի 11-ի համաձայնագրերի կատարման բոլոր ասպեկտների շուրջ: Հատուկ շեշտադրվել է ռազմագերիների փոխանակման, հումանիտար օգնության, տարածաշրջանում տրանսպորտային կապերի ապաշրջափակման քննարկումը, այդ թվում`փոխվարչապետերի մակարդակով եռակողմ աշխատանքային խմբի ջանքերի համատեքստում:

Գոհունակությամբ արձանագրվել է, որ ռուս-հայկական բազմակողմ դաշնակցային հարաբերությունները, չնայած կորոնավիրուսի համավարակին, շարունակում են ինտենսիվ զարգանալ՝ ի բարօրություն մեր երկրների եւ ժողովուրդների: Համաձայնություն է ձեռք բերվել, սանիտարական սահմանափակումների վերացմանը զուգահեռ, երկկողմ փոխանակումների հետեւողական ակտիվացման անհրաժեշտության մասին:

Քննարկվել են նաեւ տարածաշրջանային եւ միջազգային օրակարգի արդիական հարցեր`շեշտը դնելով Կովկասում տիրող իրավիճակի վրա: