Սիրիան հետ է մղել իսրայելական հրթիռային հարձակումը Համա նահանգում

Սիրիական հակաօդային պաշտպանությանը հաջողվել է խոցել Համա նահանգի արևմտյան ուղղությամբ արձակված իսրայելական հրթիռների մեծ մասը: Այս մասին հայտնում է SANA գործակալությունը՝ հղում կատարելով երկրի պաշտպանության նախարարությանը:

«Մեր հակաօդային պաշտպանության համակարգերը հայտնաբերել են հակառակորդի հրթիռները և խոցել դրանց մեծ մասը»,- ասվում է հաղորդագրության մեջ:

Նախարարության տվյալներով՝ հարձակումը եղել է Լիբանանի օդային տարածքից: Պաշտպանության նախարարությունը պարզաբանել է, որ հարձակման օբյեկտը կարող էր լինել Մասյաֆ քաղաքի մոտակայքում գտնվող հետազոտական կենտրոնը: Հարձակումից տուժածների մասին տեղեկություններ չկան:

Ավելի վաղ՝ նոյեմբերի 25-ին, իսրայելական բանակը Գոլանի բարձունքներից ավիահարված էր հասցրել Դամասկոսի հարավին: Հարվածների մեծ մասը հետ էր մղվել հակաօդային պաշտպանության համակարգերով: