Այս կառավարության մնալու դեպքում Արցախի ճակատագիրը սպառնում է նաև մեզ. Գագիկ Ծառուկյան

Աշխարհում չկա մի դեպք, երբ այսպիսի խայտառակ կապիտուլյացիոն փաստաթուղթ ստորագրած, այսքան զոհեր տված, Արցախի 75 տոկոսը հանձնած որևէ երկրի ղեկավար փորձի մնալ իշխանության: Դատարկ խոսելով, հեքիաթ պատմելով, ֆեյքերով երկիր չես կարող կառավարել: Այս մասին այսօր լրագրողների հետ հանդիպման ժամանակ ասաց «Բարգավաճ Հայաստան» կուսակցության նախագահ Գագիկ Ծառուկյանը՝ խոսելով պատերազմի ընթացքում Կառավարության սխալների, դրա հետևանքների և Նիկոլ Փաշինյանի հրաժարականի պարտադիր լինելու մասին: 

Խոսելով պատերազմից հետո անտուն մնացած գերիների, անհետ կորածների  խնդիրների մասին՝ Ծառուկյանը շեշտեց՝ անհասկանալի է այն պատասխանը, թե՝ գնացեք, թողեք աշխատենք: «Եղբայր, մարդն իր կեսն է թողել, չի կարելի այդպես վերաբերվել, իրականությունն ասեք, քայլեր կատարեք, բանակցեք, որ մարդիկ չգժվեն, սա անընդունելի է: Այսօր պետք է արդարացի մոտեցում և խնդիրներին ճիշտ լուծում տանք. մարդկանց խնդրի, ողբի, սգի մեջ պետք  է մտնես»:

Ըստ նրա՝ ցանկացած պատասխանատու երկրի ղեկավար պետք է այս հարցրեով զբաղվեր, որը սակայն չենք տեսնում: ԲՀԿ ղեկավարի խոսքով՝ այս իշխանությունն անկարող է երկիրը զարգացնել: Վերջինիս համոզմամբ՝ այս պատերազմում մեծ կորուստների պատճառը եղել է անօդաչու սարքերի դեմ պայքարի անհնարինությունը:

«Օդը բաց է եղել: Նիկոլ Փաշինյանը 130 միլիոն տվել էր, 4 ինքնաթիռ էր բերել սելֆիի համար, 130 միլիոն էլ թող՝ տրամադրեին օդը փակելու համար և վերջ, հարցը փակվում էր: Պատրազմին վատ նախապատրաստվելու համար ներկայիս իշխանությունը պետք է պատասխանատվություն կրի: Պետք է պատասխան տա, չհասկացա, բա այս խայտառակ պարտության, այս զոհերի պատասխանը ո՞վ է տալու, ով ղեկավարել է, նա էլ պետք է պատասխան տա, հիմա կտան, հետո կտան, չգիտեմ, բայց ոնց կարող են չտալ»,- շեշտեց Ծառուկյանը:

Մանրամասները՝ Կենտրոն Հ/Ը տեսանյութում: