Հայ ժողովրդի սթափվելու ժամանակը` «Երևանը, Զանգեզուրը, Սևանը` մեր պատմական հողերն են». Ալիևի հոխորտանքը՝ շքերթի ժամանակ

Այսօր՝ դեկտեմբերի 10-ին, Բաքվում անցկացվել է «Հաղթանակին նվիրված զորահանդես», որին ներկա են եղել նաև Թուրքիայի նախագահ Ռեջեփ Թայիփ Էրդողանը։ Զորահանդեսին մասնակցել են թուրքական ԶՈՒ ստորաբաժանումներ՝ որպես ապացույց Արցախյան վերջին պատերազմում Թուրքիայի անմիջական մասնակցության։

Հեռարձակման ժամանակ, ոչ պատահականորեն, Իլհամ Ալիևի ելույթը զուգահեռաբար թարգմանվել է ռուսերեն։ Նույնիսկ Թուրքիայի նախագահի ֆեյսբուքյան և յութուբյան պաշտոնական էջերով հեռարձակվող և պետական «Անադոլու» գործակալության ուղիղ եթերներում Ալիևի խոսքը թարգմանվել է ռուսերեն. այստեղ անհրաժեշտ է նշել, որ ռուսերենը Թուրքիայում տարածված լեզու չէ, իսկ ադրբեջանական թյուրքերենով խոսող Ալիևի խոսքերը նման դեպքերում կա՛մ չեն թարգմանվում, կա՛մ էլ թարգմանվում են թուրքերեն (ադրբեջաներենը բավական նման է թուրքերենին, ուստի երբեմն անհրաժեշտություն չի լինում թարգմանելու)։ Թե ինչո՞ւ է Ալիևի ելույթը ռուսերեն թարգմանվել, կարծում ենք դժվար չէ գլխի ընկնել.դա ուղղված է առաջին հերթին հայերի դեմ՝ բարոյահոգեբանական վիճակը թուլացնելու համար։

Իր ելույթում Ալիևն, անշուշտ, խորին շնորհակալությունն է հայտնել Էրդողանին և Թուրքիային ամեն տեսակի աջակցության համար, այնուհետև նա հայտարարել է. «Զանգեզուրը, Սևանը և Երևանը Ադրբեջանի պատմական տարածքներն են, որտեղից հարյուրհազարավոր ադրբեջանցիներ են վտարվել 1980-ականների վերջին»։

Իր հերթին, Էրդողանը ելույթի ընթացքում, «ավանդական» հայտարարություններից բացի, ևս մեկ ուշագրավ հայտարարություն է արել. «Ադրբեջանական հողերի ազատագրումը օկուպացիայից՝ չի նշանակում, որ մեր պայքարն ավարտված է»։

Երեկ արդեն հայտնել էինք, որ Թուրքիայում ակտիվորեն քննարկում են Հայաստանի ամբողջ հարավին տիրանալու մտադրությունները։ Այսօրվա երկու հայտարարությունները ևս եկան փաստելու, որ Արցախը միայն առաջին քայլն էր դեպի պանթուրանական ծրագրեր, իսկ այդ ճանապարհին Հայաստանը դեռևս շարունակում է մեծ խոչընդոտ լինել Թուրքիայի համար։

Զորահանդեսի ընթացքում մեծ քանակության զինատեսակների ցուցադրությունը նույնպես նպատակ ուներ ուղերձ հղելու, որ պատերազմը դեռևս չի ավարտվել, և նրանց ախորժակն ավելի մեծ է, քան միայն Արցախը։

Իսկ մինչ այդ ՀՀ իշխանությունները ցանկություն են հայտնում երկրի համար բացել ադրբեջանական շուկան, շրջանառում են հայերի և ադրբեջանցիների խաղաղ գոյակցության կեղծ թեզերը, Ադրբեջանի հետ դիվանագիտական հարաբերություններ հաստատելու ցանկությունը՝ տպավորություն ստեղծելով, որ այսօրվա իշխանություններն այդպես էլ չեն ընկալում թշնամու ակներև մտադրությունները կամ, որ ավելի աղետալի է, գիտակցաբար գնում են հայակործան ծրագիր իրականացնելու։

Ժամանակն է, որպեսզի ազգն արթնանա քնից, ժամանակն է գիտակցելու, որ Էրդողան-Ալիև-Փաշինյան եռյակն իր գործն ամբողջությամբ չի ավարտել, իսկ թուրք-ադրբեջանական հաջորդ հարվածը Հայաստանին, այս իշխանությունների օրոք, կործանարար կլինի հայկական պետականության և, ինչու չէ, նաև հայ ազգի հետագա գոյության համար։