Արցախում անհետացած սիրիացի զինյալների ընտանիքները դիմել են Էրդողանին

«Սուլեյման Շահ» դիվիզիայից «Ամաշատ» խմբավորման սիրիացի վարձկանների ընտանիքները դիմում են ուղարկել արաբական լրատվամիջոցներին, Էրդողանին և Սիրիայի բռնազավթման համար պատասխանատու այլ թուրք ղեկավարների: Նրանք խնդրում են առաջնորդ Աբու Ամաշային՝ ստիպել բացահայտել Արցախ ուղարկված՝ իրենց անհայտ կորած հարազատների ճակատագիրը: Այդ մասին հայտնում է Военкоры Русской Весны թելեգրամյան ալիքը:

«Մենք տեղահանված սիրիացի ընտանիքների խումբ ենք՝ Սիրիայի հյուսիսում գտնվող ճամբարներից, կյանքի վատ պայմաններով: Մենք դաժանության և ճնշումների պատճառով լքել ենք մեր քաղաքները, բայց Աբու Ամաշան օգտվեց մեր աղքատությունից և աղետից՝ հավաքագրելով մեր երեխաներին և, առանց ռազմական պատրաստություն անցկացնելու, նրանց ուղարկեց պատերազմելու Ադրբեջանում՝ սարսափելի պայմաններում: Նրանց հետ կապը ընդհատվել է, և Աբու Ամաշան ավելի քան մեկ ամիս է՝ հրաժարվում է տեղեկություններ տրամադրել նրանց ճակատագրի մասին:

Հուսով ենք, որ մեր կոչը կհասնի պարոն Էրդողանին և բոլոր թուրք պաշտոնյաներին, և նրանք ճնշում կգործադրեն, այսպես կոչված, Աբու Ամաշայի վրա»,- ասվում է հաղորդագրության մեջ: