Տուլայում վթարից զոհվածների ընտանիքները մեկ միլիոն դրամի փոխհատուցում կստանան. Գագիկ Բեգլարյան

Տուլայում տեղի ունեցած վթարի հետևանքով մահացածներից մեկի դիակն այսօր Ռուսաստանից բերվեց Հայաստան. այսօր խորհրդարանում լրագրողներին հայտնեց ՀՀ տրանսպորտի և կապի նախարար Գագիկ Բեգլարյանը: Նրա խոսքով` ՌԴ-ում մնացել է 11 վիրավոր, որոնցից մեկի վիճակը շատ ծանր է: «Լավ կլինի, որ այդ մարդու կյանքը փրկվի»,- հույս հայտնեց Բեգլարյանը:

Հարցին, թե վթարի համար ո՞վ է  պատասխանատվություն կրելու, նախարարը պատասխանեց. «Այսօր գործող օրենքով, ուղևորափոխադրումների առումով, այդ մեքենան, վարորդը օրենքի մեջ են գտնվում, և քննության վերջում պարզ կլինի`կոնկրետ պատասխանատվությունն ում վրա է ընկնում: Ես մի բան կարող եմ ասել հստակ, որ պետությունը, այս վթարի հետ կապված, միայն մարդկային պատասխանատվություն ունի: Այսինքն` մենք, որպես պետություն, պետք է անպայման մեր համաքաղաքացիներին օգնենք, դժվար պահին կարողանանք ամեն ինչով լինել նրանց կողքին: Պատասխանատվություն՝ որպես այդպիսին, քննությունից հետո պարզ կլինի` ով կկրի»:

Բեգլարյանը նշեց նաև, որ կառավարությունը ավտոբուսի վթարից տուժածների ընտանիքներին ֆինանսական հատկացումներ է անելու, և գումարի հստակ չափը պարզ է դառնալու այսօրվա նիստի ընթացքում, որը հրավիրել է տրանսպորտի և կապի նախարարը:

«Այսօր նիստ եմ հրավիրվել, և նիստը վերջնական որոշում կկայացնի: Երևի թե մահացածներից յուրաքանչյուրի ընտանիքին միլիոն դրամից ավելի գումար կտանք, կոնկրետ թիվը հանձնաժողովից հետո պարզ կլինի, իսկ տուժածների ընտանքիներին՝ մինչև միլիոն դրամ»,- ասաց Բեգլարյանը և հավելեց, որ բոլոր այն ծախսերը, որոնք առնչվում են տուժածների, մահացածների տեղափոխմանը, արարողությունների կազմակերպմանը, կառավարությունը նույնպես վերցրել է իր վրա:

Նախարարը տեղեկացրեց նաև, որ ողբերգական վթարից տուժածներին առանձնակի օգնություն են ցուցաբերել ոչ միայն Ռուսաստանի իշխանությունները, այլև մեր հայրենակիցները: Նրա խոսքով` Տուլայի կենտրոնում գտնվող հյուրանոցները, որոնք մեր հայրենակիցներին են պատկանում, երեք օր շարունակ բոլոր հայերին անվճար են սպասարկել: «Հայերն իրենց այդ տարածքում պահել են շատ արժանապատիվ, և այդ մասին ինձ ասել են նաև Ռուսաստանի ղեկավարները: Առանձնազրույցում ասում էին, որ տեղի հայերը` անկախ իրենց սոցիալական վիճակից, ամեն ինչով եղել են տուժածների կողքին»,- նշեց Բեգլարյանը: