ԱՊԿ գլխավոր քարտուղար Լուիս Ալմագրոյի հայտարարությունը Լեռնային Ղարաբաղում Ադրբեջանի վերջին ռազմական հարձակումների վերաբերյալ

Ամերիկյան պետությունների կազմակերպության գլխավոր քարտուղար Լուիս Ալմագրոն հայտարարությամբ է հանդես եկել Լեռնային Ղարաբաղում Ադրբեջանի վերջին ռազմական հարձակումների վերաբերյալ:

Հայտարարությունում, մասնավորապես, ասվում է. 

«Ամերիկյան պետությունների կազմակերպության գլխավոր քարտուղարությունը խստորեն դատապարտում է վերջերս Լեռնային Ղարաբաղում տեղի ունեցած` Ադրբեջանի ռազմական ագրեսիան, որն ուղղակիորեն անտեսում է ՄԱԿ-ի՝ հակամարտությունների խաղաղ լուծման հասնելու, ինչպես նաև երկարատև խաղաղություն ու կայունություն խթանելու կոչերը: 

Ավելին` մենք Ադրբեջանին կոչ ենք անում անհապաղ դադարեցնել ռազմական գործողությունները, հատկապես` խաղաղ բնակչության դեմ ուղղված գործողությունները:

Արդեն նշեցինք, որ, որպես ռազմական թիրախ, խաղաղ բնակչության վրա հարձակման պրակտիկան պետք է ոչնչացվի, և որ զինված բախումը կարգավորող հիմնական կանոնների լիակատար խախտում է:

ԱՊԿ ԳՔ-ն վերահաստատում է Եվրոպայի անվտանգության և համագործակցության կազմակերպության Մինսկի խմբի (ԵԱՀԿ Մինսկի խումբ)  ղեկավարած բանակցային գործընթացի փրկության և վերագործարկման անհրաժեշտությունը և ընդգծում, որ այս հակամարտությունը կարող է լուծվել միայն բանակցային գործընթացի միջոցով՝ միջազգային իրավունքի և 1975 թվականի Հելսինկյան համաձայնագրերում հաստատված սկզբունքների հիման վրա:

Նույնքան կարևոր է, որ մենք կոչ ենք անում արտաքին ուժերին՝ զերծ մնալ զինված հակամարտությանը միջամտելուց` ճգնաժամը սրելու նպատակով:

Մենք մեր լիակատար աջակցությունն ենք հայտնում Լեռնային Ղարաբաղի ժողովրդին և մեր անկեղծ ցավակցությունը՝ ադրբեջանական և հայկական ուժերի միջև բռնի բախումների զոհերին»: