Վաշինգտոնում ոստիկաններն աֆրոամերիկացու են գնդակահարել

Ոստիկանները Վաշինգտոնում աֆրոամերիկացու են գնդակահարել: Այդ մասին սեպտեմբերի 2-ին հաղորդել է Կոլումբիայի օկրուգի ոստիկանությունը՝ հայտնելով, որ միջադեպի վայրում գտնվել է հրազեն:

Մայրաքաղաքի ոստիկանության պետ Փիթեր Նյուսեմն ավելի ուշ լրագրողներին հայտնել է, որ հրաձգությունը տեղի է ունեցել Անաքոստիայի ռազմաբազայից ոչ հեռու: Կարգի պահապանները մոտեցել են ավտոմեքենային, որում, ենթադրաբար, նստած են եղել զինված մարդիկ: Մի քանի հոգի դուրս են թռել ավտոմեքենայից եւ դիմել փախուստի: Այդ պահին ոստիկաններից մեկը կրակել է և վիրավորել փախչող երիտասարդին: Նա հոսպիտալացվել է, հիվանդանոցում արձանագրել են նրա մահը:

«Մենք կարծում ենք, որ կասկածյալի մոտ այդ ժամանակ (հրաձգության) զենք է եղել»,- ասել է Նյուսեմը:

ԱՄՆ-ում բողոքների եւ անկարգությունների ալիքը տարածվել է մայիսի վերջից: Բողոքողներն արդարություն են պահանջում այն աֆրոամերիկացիների գործերում, որոնք սպանվել կամ տուժել են ոստիկանության ձեռքից: Մի շարք քաղաքներում, ներառյալ՝ մայրաքաղաք Վաշինգտոնում, եղել են զանգվածային անկարգություններ եւ կողոպուտներ: