ԱՄՆ Ներկայացուցիչների պալատը կքննարկի Արցախում ականազերծումը ֆինանսավորելու նախագիծը. ԱՄՆ Հայ դատի հանձնախումբ

ԱՄՆ Ներկայացուցիչների պալատի հանձնաժողովը, նախագահությամբ Ջիմ ՄաքԳավերնի, ճանապարհ է բացել Ամերիկայի Հայ դատի հանձնախմբի աջակցությամբ կատարված փոփոխության նախագծի համար` Արցախում մարդասիրական ականազերծման համար միջոցներ հատկացնելու վերաբերյալ. այս մասին Yerkir.am-ին տեղեկացնում են ԱՄՆ Հայ դատի հանձնախմբից, նշելով՝ այն կքննարկվի և կքվեարկվի ԱՄՆ Ներկայացուցիչների պալատի լիագումար նիստում: 

ԱՄՆ Ներկայացուցիչների պալատը մտադիր է այս փոփոխության հարցը քննարկել հինգշաբթի՝ հուլիսի 23-ին, քանզի սկսում է 2021 թվականի հարկաբյուջետային տարվա արտասահմանյան օգնության օրինագծի քննարկումները: Նախագծով կոչ է արվում 1.4 մլն դոլարի օգնություն տրամադրել Արցախին՝ շարունակելու HALO Trust-ի՝ կյանքեր փրկող ականազերծման ջանքերը: 

Փոփոխության նախագիծը ղեկավարում է Կոնգրեսի հայկական հանձնախմբի համանախագահ Ջեքի Սփիերը և մի քանի ներկայացուցիչներ. այն աջակցություն է ստացել ավելի քան երեսուն անդամների կողմից:

Այս առնչությամբ ԱՄՆ Հայ դատի հանձնախմբի գործադիր տնօրեն Արամ Համբարյանն իր շնորհակալությունն է հայտնել հանձնաժողովի նախագահ ՄաքԳավերնին։

Նա, մասնավորապես, նշել է. «Մենք ցանկանում ենք շնորհակալություն հայտնել Նախագահ ՄաքԳավերինին այն բանի համար, որ ԱՄՆ Ներկայացուցիչների պալատը հնարավորություն ունի ցուցաբերել աջակցություն Արցախին և համայն հայությանը՝ տարիների ընթացքում տեղի ունեցած ամենաահաբեկչական ադրբեջանական հարձակման արդյունքում», ու հավելել. «Մեր համայնքը խորապես երախտապարտ է  բոլոր նրանց, ովքեր այդքան շատ են աշխատում խաղաղության համար»: