Ի՞նչ փուլում է ԱԺ ընդունած օրենքի սահմանադրականությունը վիճարկող՝ ՍԴ ուղարկված դիմումը

ԲՀԿ կողմից ՍԴ մուտքագրված դիմումը վարույթ ընդունելու հարցով դատարանը դեռևս որոշում չի կայացրել, Yerkir.am-ին տեղեկացրեց ՍԴ աշխատակազմի ղեկավար Էդգար Ղազարյանը։

«Դեռևս դրա վերաբերյալ որևէ որոշում դատարանը չի կայացրել։ Ըստ օրենքով սահմանված ընթացակարգի՝ նման դիմումների համար նախատեսվում է քսանօրյա ժամկետ նախնական ուսումնասիրության համար, որը կարող է դատարանի աշխատակարգային նիստով երկարացվել», - ասաց Ղազարյանը։

Հիշեցնենք՝ ԲՀԿ-ն ՍԴ դիմում էր ուղարկել՝ վիճարկելով Սահմանադրությունը փոփոխելու մասին խորհրդարանի կողմից ընդունված նախագծի սահմանադրականությունը: Վերջինովս նախատեսվում է չեղարկել դրույթը, որով ուղղակիորեն նախատեսվում է սահմանադրական փոփոխությունների նախագիծն առաջին ընթերցմամբ ընդունելուց հետո ուղարկել Սահմանադրական դատարան՝ պարզելու առաջարկվող փոփոխությունների համապատասխանությունը ՀՀ Սահմանադրությանը։

ՍԴ դիմելու համար անհրաժեշտ է պատգամավորների ընդհանուր թվի մեկ հինգերորդի ստորագրությունը։ Դիմումը ՍԴ-ին է հանձնվել 26 պատգամավորի ստորագրությամբ։ ԲՀԿ խմբակցության պատգամավորներից բացի՝ այն ստորագրել է անկախ պատգամավոր Տիգրան Ուրիխանյանը։

Իրավաբանական հանրույթում տարբեր կարծիքներ կան առ այն, թե քանի պատգամավորի ձայն է անհրաժեշտ ՍԴ դիմելու համար։ Մի մասը պնդում է, որ նվազագույնն անհրաժեշտ է 27 պատգամավորի ստորագրություն։