Հասկանում եմ նրանց, ովքեր դեմ են քվեարկել փոփոխություններին, ովքեր կողմ են, շնորհակալություն. Պուտին

ՌԴ նախագահ Վլադիմիր Պուտինը շնորհակալություն է հայտնել երկրի քաղաքացիներին, որոնք կողմ են քվեարկել ՌԴ Սահմանադրության փոփոխություններին: Նախագահը դա արել է այսօր` հուլիսի 2-ին, «Հաղթանակ» կազմկոմիտեի նիստի բացման ժամանակ. տեղեկացնում է Yerkir.am-ը` EADaily-ին հղումով:

«Ցանկանում են շնորհակալական խոսքով դիմել Ռուսաստանի քաղաքացիներին, ցանկանում եմ ասել` մեծ շնորհակալություն աջակցության ու վստահության համար: Հասկանում եմ նաև այն քաղաքացիներին, որոնք դեմ քվեարկեցին»,- ասել է Պուտինը:

Ըստ նրա` դեմ քվեարկողները մեղավորություն չունեն, պարզապես իշխանությունները հաճախ թերի են աշխատում կոնկրետ դեպքերում:

«Մենք բազմաթիվ չլուծված խնդիրներ ունեն, դա ճիշտ է: Մարդիկ հաճախ բախվում են անարդարության, կոպտության, անտարբերության հետ, շատերը դեռևս ապրում են դժվար ու  բարդ, իսկ մեզ` երկրի ղեկվարությանը, հաճախ թվում է, որ մենք արել ենք ամեն հնարավորը: Բայց` ոչ, կյանքն այլ բան է ցույց տալիս, կյանքը ցույց է տալիս, որ մենք հաճախ թերի ենք աշխատում, իսկ հարկավոր է գործել արագ, հստակ, կազմակերպված, արդյունավետ»,- նշել է ՌԴ նախագահը` հավելելով, որ ներկայումս իշխանությունները պետք է արդարացնեն Սահմանադրության փոփոխություններին կողմ քվեարկած քաղաքացիների վստահությունը:

Պուտինը պարզաբանել է, որ ԽՍՀՄ-ի փլուզումից հետո երկար ժամանակ չի անցել, և ժամանակակից Ռուսաստանը դեռևս ձևավորման, կայացման փուլում է, ու դա վերաբերում է կյանքի բոլոր կողմերին` և՛ քաղաքական համակարգին, և՛ տնտեսությանը:

«Մենք շատ բաներում դեռևս խոցելի ենք: Մեզ հարկավոր է ներքին կայունություն և ժամանակ` երկրի, բոլոր ինստիտուտների ամրապնդման համար»,- նշել է նախագահը:

Ի դեպ, ՌԴ նախագահի մամուլի քարտուղար Դմիտրի Պեսկովի խոսքով` նախագահի վարչակազմը չի պատրաստվում հաշիվ պահանջել այն տարածաշրջանների ղեկավարներից, որտեղ համառուսաստանյան քվեարկությանը քիչ մարդ է մասնակցել: Ինչ վերաբերում է Նենեցական ինքնավար մարզում քվեարկության արդյունքներին` 56 տոկոս դեմ, ենթադրություն կա, որ դա պայմանավորված է մարզը Արխանգելսկի շրջանին հնարավոր միացման վերաբերյալ քննարկումների հետ: Պեսկովը հավաստիացրել է, որ Կրեմլը այդ արդյունքը չի ընկալում որպես անվստահություն ՌԴ նախագահի հանդեպ: