Հավանություն է ստացել այն օրինագիծը, որը գինեգործության մասին օրենսդրությունը համապատասխանեցնում է ԵՏՄ տեխկանոնակարգին

ՌԴ կառավարության օրինագծային գործունեության հարցերով հանձնաժողովը հավանություն է տվել այն օրենքի նախագծին, որը գինեգործության մասին օրենսդրությունը համապատասխանեցնում է ԵՏՄ տեխկանոնակարգին. այս մասին գրում է ՏԱՍՍ-ը, նշելով՝ հանձնաժողովի պատրաստած կառավարության արձագանքի նախագիծն իր տրամադրության տակ է: 

Նշվում է՝ խոսքն այն օրինագծի մասին է, որի հեղինակներն են Պետական դումայի փոխխոսնակ Ալեքսեյ Գորդեեւը («Եդինայա Ռոսիա») և Դումայի ագրարային հարցերով կոմիտեի ղեկավար Վլադիմիր Կիշինը (ՌԴ Կոմունիստական կուսակցություն):

Նախագիծը խաղողագործության ու գինեգործության վերաբերյալ ռուսական օրենսդրությունը համապատասխանեցնում է Եվրասիական տնտեսական միության «Ալկոհոլային արտադրանքի անվտանգության մասին» տեխնիկական կանոնակարգին (այն ուժի մեջ է մտնում 2021 թվականի հունվարի 9-ից) և միջազգային ակտերին ու Եվրամիության ստանդարտներին, որոնցում գինեգործական արտադրանքին ներկայացվող տարբեր պահանջներ ու բնութագրեր կան:

Հավելվում է, որ օրինագիծը մասնավորապես «պաշտպանված աշխարհագրական նշումով գինի» հասկացությունը լրացնում է այն դրույթով, ըստ որի՝ այն պատրաստվում է ոչ միայն որոշակի խաղողագործական-գինեգործական գոտու սահմաններում աճեցված խաղողից, այլև որոշակի խաղողագործական-գինեգործական շրջանում:

Ըստ նախագծի՝ գինեգործության մասին նախկինում ընդունված օրենքի դրույթները չեն կիրառվի մինչև օրենքի ուժի մեջ մտնելը թողարկված գինեգործական արտադրանքի շրջանառության վրա:

Միևնույն ժամանակ գինու պահվող նյութի համար նախատեսվելու է անժամկետ պահում՝ արտադրության մեջ դրանց հետագա օգտագործման համար, որը կարող է իրականացվել մինչև օրենքի ուժի մեջ մտնելը՝ ըստ գործող կանոնների: Բացի այդ, օրինագծով առաջարկվում է անցկացնել գինու հումքի և գինեգործական արտադրանքի մեկանգամյա գույքագրում, որոնք գտնվում են գինեգործական ձեռնարկությունների տարածքում ու նրանց են պատկանում սեփականության իրավունքով՝ նշելով դրանց ծավալը միասնական պետական ավտոմատացված տեղեկատվական համակարգում:

Միևնույն ժամանակ նախագծով առաջարկվում է ընդլայնել խաղողագործության և գինեգործության սուբյեկտներին խթանելու մի շարք միջոցառումներ։ 

Այս առնչությամբ կառավարության արձագանքի նախագծում ասված է. «Նշված փոփոխությունները կպահանջեն դաշնային բյուջեի լրացուցիչ ծախսեր: Ընդ որում՝ օրինագծի ֆինանսատնտեսական հիմնավորման մեջ հաշվարկներն ու հիմնավորումները, ինչպես նաեւ այդ միջոցառումների ֆինանսավորման աղբյուրները նշված չեն» ու հավելվում՝ գործադիրն օրինագծին աջակցում է այն վերջնամշակելու պայմանով: