Ռիչմոնդում ցուցարարները կոտրել են Կոլումբոսի արձանը

Վիրջինիա նահանգի Ռիչմոնդ քաղաքում բողոքի ակցիայի մասնակիցները կոտրել են Բեր-պարկում տեղադրված Քրիստափոր Կոլումբոսի արձանը և այն նետել լիճը. այս մասին հայտնում է WRIC հեռուստաալիքը:

Մասնավորապես, հունիսի 9-ի երեկոյան ցուցարարները երեք պարանի օգնությամբ կարողացել են պատվանդանի վրայից գցել արձանը և տեղափոխել մոտակա ջրանցք. նրանք Կոլումբոսին գցել են ջուրը: Ըստ ականատեսների՝ ակցիան նախապես ծրագրված չէր, բայց ցուցարարները բազմիցս կոչ են արել իշխանություններին հանել հուշարձանը:

Հիշեցնենք՝ ոստիկանության կողմից Մինեապոլիսում աֆրոամերիկացի Ջորջ Ֆլոյդի սպանության պատճառով սկսված անկարգությունները և բողոքի ցույցերը չեն դադարում Միացյալ Նահանգներում: Ռիչմոնդում ցուցարարները քաղաքական և ռազմական գործիչների բազմաթիվ հուշարձաններ են փչացրել, որոնց թվում են Ռոբերտ Լիի և Ջեֆերսոն Դևիսի արձանները: