ՏԵՍԱՆՅՈՒԹ․ Նպատակահարմար ենք գտնում Արցախում դիմակ կրելը դարձնել պարտադիր․ Արայիկ Հարությունյան

Հաշվի առնելով Հայաստանի Հանրապետության փորձը՝ մենք նպատակահարմար ենք գտնում Արցախի Հանրապետությունում դիմակ կրելը դարձնել պարտադիր՝ ըստ Yerkir.am-ի ասաց Արցախի Հանարպետության նախագահ Արայիկ Հարությունյանը ֆեյսբուքյան ուղիղ եթերում:

«Մենք չենք ասում, որ այն հենց այսօր կամ վաղը դառնալու է պարտադիր, բայց այն պետք է փուլային լինի: ԱՀԿ-ի խորհուրդն էլ այդպիսին է, որ դիմակը պետք է դարձնենք պարտադիր, ինչը նվազեցնելու է տարածման ռիսկը»,-ասաց նա:

Արցախի Հանրապետության նախագահը հանդես  եկավ կորոնավիրուսի դեմ պայքարի կանոնների խստացման հետ կապված առաջիկա անելիքների մասին հայտարարություններով: Նա ասաց, որ ծանր մարտահրավերին դիմակայելու համար օր առաջ ապրելակերպում փոփոխություններ են անհրաժեշտ, հակառակ դեպքում հետևանքներն անդառնալի են լինելու:

Նրա խոսքով Արցախում կորոնավիրուսի դեպքերն այս պահին լինում են հատուկենտ ու վերահսկելի:

Հարությունյանը խոսեց Հայաստանում վարակակիրների թվի աճի մասին՝ հույս հայտնելով, որ սա արդեն գագաթնակետն է ու այսուհետ թվերի նվազում կլինի:

Այսւոհանդերձ, նա համոզված է, որ պետք է խիստ կարգով պահպանել կանոնները, ինչը թույլ կտա զերծ մնալ վարակման ավելի արագ տեմպերից:

Նախագահը կարևորեց հանրային գիտակցությունը՝ նշելով, որ քաղաքացիները պետք է պայքարեն:

«Մենք հստակ կանոններ ենք ֆիքսելու ու պատասխանատվության ենք ենթարկելու նրանց, ովքեր խախտելու են կանոնները: Ինչպես տեսնում ենք ՀՀ փորձից, վարակի ամենամեծ տարածման աղբյուրը թաղումներն են: Պետք է շատ խստացնել, եթե դա չանենք, ունենալու ենք շատ թաղումներ: Իսկ քիչ թաղումներ ունենալու համար պետք է գոնե նման դեպքերում պահպանենք կանոնները»,-հայտարարեց Արայիկ Հարությունյանը:

Մանրամասն՝ տեսանյութում․