Չեխիան արտաքսել է «լրտեսության» մեջ մեղադրվող երկու ռուս դիվանագետի

Հունիսի 7-ին երկու ռուս դիվանագետներ հեռացել են Պրահա քաղաքից, որոնց Չեխիայի իշխանությունները «լրտեսական սկանդալի» պատճառով որոշել էին արտաքսել երկրից: Այս մասին, ինչպես հաղորդում է Mlada fronta DNES թերթը, հայտարարել է Չեխիայի արտգործնախարար Թոմաշ Պետրժիչեկը:

Ըստ Արտաքին գործերի նախարարության ղեկավարի՝ մոտակա ժամանակներս Մոսկվայում վայրէջք կկատարի ռուս դիվանագետներին տեղափոխող օդանավը:

Հունիսի 5-ին Չեխիայի վարչապետ Անդրեյ Բաբիշը, արտգործնախարար Թոմաս Պետրժիչեկի հետ համատեղ մամուլի ասուլիսի ընթացքում, նշել է, որ Չեխիայում Ռուսաստանի դեսպանատան երկու աշխատողներ հայտարարվել են «պերսոնա նոն գրատա»:

Ըստ նրա, պատճառն այն է, որ իբր ՌԴ դեսպանատան աշխատակիցներից մեկը կեղծ տեղեկություններ է տարածել չեխ քաղաքական գործիչների վրա ծրագրված «հարձակման» մասին: