«Արևմտյան գործընկերները» գովասանքի են արժանացրել Վրաստանին հնազանդության համար. fondsk.ru

Անցյալ ուրբաթ Վրաստանի նախագահ Սալոմե Զուրաբիշվիլին հրաման ստորագրեց քաղաքական գործերով դատապարտված երկու ընդդիմադիր քաղաքական գործիչների ներում շնորհելու մասին: Նրանց ազատ արձակումը, «արևմտյան գործընկերների» կարծիքով, մարտի 8-ին Վրաստանի կառավարության և միացյալ ընդդիմության միջև ձեռք բերված համաձայնության մաս էր: Եվ «գործընկերներն» ըստ արժանվույն գնահատեցին նախագահի` բարի կամքի ժեստը. ըստ yerkir.am-ի` գրում է fondsk.ru կայքը:

«Մենք ողջունում ենք Վրաստանի նախագահի որոշումը` օգտվել իրեն վերապահված սահմանադրական լիազորություններից երկրում քաղաքական բևեռացումը պարպելու և ազատ, արդար ու թափանցիկ ընտրական գործընթացի համար բարենպաստ միջավայր ստեղծելու նպատակով: Մենք` քաղաքական երկխոսության միջնորդներս, համարում ենք, որ այդ որոշումը կարևոր ներդրում է մարտի 8-ի համաձայնության իրականացման գործում»,-ասվում է կառավարության և ընդդիմության միջև բանակցությունների միջնորդ-դիվանագետների համատեղ հայտարարության մեջ, որոնք կոչ են անում ամբողջությամբ իրագործել համաձայնությունը:

ԱՄՆ-ում նույնպես մեկնաբանել են ընդդիմադիրների ազատ արձակման փաստը:

«Մենք ողջունում են պարոն Օկրուաշվիլիի և պարոն Ուգուլավայի ներումն ու բանտից ազատ արձակումը: Հուսով ենք, որ այսուհետ և մշտապես վերջ կտրվի դատական գործունեությանը քաղաքական միջամտությանը»,- ասվում է սենատորներ Ջեյմս Ռիշի և Ջին Շահինի համատեղ հայտարարության մեջ:

Սակայն, սենատորների կարծիքով, դա բավարար չէ, նրանք սպասում են նաև երրորդ քաղաքական գործչի`Գեորգի Ռուռուայի ազատ արձակմանը, որը նույնպես դատապարտվել է քրեական գործով: Օվկիանոսից այն կողմ վստահ են` նրան դատապարտել են կեղծ մեղադրանքով:

«Նոր Վրաստան» կուսակցության առաջնորդներից Գեորգի Վաշաձեն հայտարարել է, որ  Վրաստանի նախագահի որոշումն ամբողջ Վրաստանի հաղթանակն է, որտեղ այլևս երբեք քաղաքական հաշվեհարդարներ չեն լինի: Նաև հիշեցրել է, որ հոկտեմբերին կայանալիք խորհրդարանական ընտրություննեիրում Վրաստանը պետք է ընտրություն կատարի` Եվրոպա և ԱՄՆ, որոնք պարտադիր օգնելու են Վրաստանին, կամ` «ռուսական վեկտոր», որի հետ «կապված են սովն ու կարիքը»:

Իսկ ազատ արձակված` «Եվրոպական Վրաստան» կուսակցության առաջնորդ Գիգի Ուգուլավան չի կասկածում, որ մեծ փոփոխությունների ժամանակն է: «Մենք պետք է հասկանանք, որ հետագա տասը տարիներին Վրաստանը մտնելու է բոլորովին նոր քաղաքական կյանք: Քաղաքական և, համապատասխանաբար, հասարակական կյանքը այլևս չի լինի այնպիսին, ինչպիսին էր անցած 30 տարիների ընթացքում: Սկսվում է մեծ ձևափոխությունների, մեծ փոփոխությունների ժամանակը»,- հայտրարարել է նա լրագրողների հետ հանդիպման ժամանակ:

Եվ միայն իշխող «Վրացական երազանք» կուսակցությունը հավանություն չի տվել քրեական հանցագործների ներմանը:

«Մենք կարծում ենք, որ վրացական քաղաքականության բևեռացումը պայմանավորված է քրեական տարրերի` բանտում չգտնվելով, այլ քաղաքականության մեջ լինելով: Եվ չենք կարծում, որ երկու քաղաքական կրիմինալների` բանտում լինելը խնդիրներ կստեղծեր երկրի արտաքին քաղաքականությունում»,- նշել է կուսակցության գործադիր քարտուղար Իրակլի Կոբախիձեն:

 Ի դեպ, Վրաստանի նախագահի որոշման հաջորդ օրն արդեն հայտնի դարձավ, որ Եվրախորհրդարանը Վրաստանին 150 մլն եվրոյի օգություն է տրամադրում: