Բաքուն օգտագործում է կորոնավիրուսը ընդդիմությանը հետապնդելու նպատակով. Human Rights Watch

Ադրբեջանի իշխանությունները օգտագործում են կորոնավիրուսի դեմ պայքարի շրջանակում մտցված սահմանափակումները և ձերբակալում է ըննդիմության ակտիվիստներին, որպեսզի լռեցնի կառավարության քննադատներին։ Այս մասին նշվում է Human Rights Watch իրավապաշտպան կազմակերպության տարածած հայտարարության մեջ. հայտնում է «Թուրան» գործակալությունը։

Վերջին մեկ շաբաթվա ընթացքում նվազագույնը 6 ակտիվիստ և ըննդիմադիր լրագրող ձերբակալվել են 10-ից 30 օր ժամկետով՝ արհեստական մեղադրանքներով։ Ըննդիմադիր գործիչներին մեղադրանք է առաջադրվել կարանտինային ռեժիմը խախտելու կամ ոստիկանությանը չենթարկվելու համար։

Գրեթե բոլոր գործիչները ձերբակալվել են կարանտինային կենտրոններում տիրող իրավիճակը քննադատելու կամ կառավարության՝ բնակչության խոցելի խավին աջակցել չկարողանալու համար։ Ձերբակալվածների մեջ է նաև մի քաղաքացի, ով իր խրոնիկ հիվանդություն ունեցող երեխային տանում էր հիվանդանոց։

«Այս ձերբակալությունները ամբողջովին համապատասխանում են Ադրբեջանում քաղաքական հատուցման ընդունված մոդելին։ Իշխանությունները պետք է դադարեցնեն օգտագործել արտակարգ դրությունը՝ պատժելու ազատ խոսքի արտահայտման համար», - նշում է HRW-ի փոխտնօրեն Գեորգի Գոգիան։

Ըստ կազմակերպության՝ մարդկանց ձերբակալությունը կարող է էլ ավելի խթանել կորոնավիրուսի տարածումը։