«Հայփոստը» նման ակցիա չի իրականացնում․ Բազմաթիվ քաղաքացիներ հաղորդագրություն են ստացել բջջային հեռախոս շահելու վերաբերյալ

«Հայփոստ» ՓԲԸ-ն հայտատարարություն է տարածել վերջին օրերին ընկերության անունից բազմաթիվ քաղաքացիների հաղորդագրություններ ուղարկելու վերաբերյալ, որոնց համաձայն՝ վերջիններս շահել են բջջային հեռախոսներ. հայտնում է Yerkir.am-ը:

Հայտարարությունում, մասնավորապես, նշվում է.

«Վերջին օրերին «Հայփոստին» են դիմել բազմաթիվ քաղաքացիներ և հայտնել, որ ստացել են «Հայփոստ» ՓԲԸ-ից հաղորդագրություն՝ բջջային հեռախոս շահելու վերաբերյալ:

Հայտնում ենք, որ «Հայփոստ» ՓԲԸ-ն նման ակցիա չի իրականացնում, տվյալ հաղորդագրությունների հետ որևէ առնչություն չունի: Անհայտ անձանց կողմից փորձ է արվում քաղաքացիներից խարդախությամբ գումար շորթել: Միևնույն ժամանակ, ապօրինի օգտագործվում է «Հայփոստ» ՓԲԸ անվանումը և ապրանքային նշանը: Հորդորում ենք բոլորին՝ նման հաղորդագրություն ստանալիս, որևէ անձնական տվյալ չտրամադրել։

Հիշեցնում ենք, որ Հայփոստի բոլոր միջոցառումների մասին հայտարարությունները հաղորդվում են բացառապես «Հայփոստ» ՓԲԸ պաշտոնական էջերով և ԶԼՄ-ներով»։