Մոսկվայում սկսվել է վայրի կենդանիների որս. պատճառը՝ կորոնավիրուսն է

Մոսկվայի «Ռոսպոտրեբնադզորի» մոսկովյան դեպարտամենտի ղեկավար Ելենա Անդրեևան պարզաբանել է, որ Մոսկվայում իրականացվում է կրծողների լայնածավալ ոչնչացում և վայրի կենդանիների որս`կորոնավիրուսի տարածումը կանխելու նպատալով. հայտնում է Yerkir.am-ը՝ ՌԻԱ «Նովոստի»-ին հղումով:

Անդրեևայի խոսքով՝ տեղի իշխանություններն անում են հնարավոր ամեն բան, որպեսզի կանխեն կորոնավիրուսի մուտքը քաղաք:

Մայրաքաղաքի օդանավակայաններում ուժեղացված է հսկողությունը. ստուգվում են բոլոր նրանք, ովքեր ժամանել են Չինաստանից:

Միևնույն ժամանակ նա նաև հավելել է, որ բնակչությունը պատշաճ կերպով ընկալում է կատարվածը, քանի որ ոչ ոք չի ցանկանում հիվանդանալ:

Վերջին տվյալներով՝ Ռուսաստանում 2 կորոնավիրուսի դեպք է  գրանցվել:

Yerkir.am-ն ավելի վաղ ներկայացրել էր նաև կորոնավիրուսի տարածվածությունն աշխարհում՝ թվերով, որտեղ նշված է՝ ժամը 09.13-ի դրությամբ ողջ աշխարհում հաստատվել է կորոնավիրուսով վարակման 81.002 դեպք, որից 2762-ը՝ մահվան, և 30.098-ը՝ առողջացման:

Հիշեցնենք՝ չինական Ուհան քաղաքում բռնկված ու ողջ աշխարհում տարածում գտնող անհայտ տիպի կորոնավիրուսով վարակվածների թիվն օր օրի աճում է։ Կորոնավիրուսի բռնկման մասին չինական իշխանությունները ԱՀԿ-ին տեղյակ էին պահել  դեռևս դեկտեմբերին: