Միմյանցից գաղտնիքներ չունենք. Պուտինը հերքում է, որ Մեդվեդևի հետ «տանդեմը» քայքայվել է

ՌԴ նախագահ Վլադիմիր Պուտինը ՏԱՍՍ լրատվական գործակալության հետ զրույցում հերքել է, որ Մեդվեդևի հետ «տանդեմը» քայքայվել է. հայտնում է yerkir.am-ը:

«Ոչինչ էլ չի քայքայվել, ինչպես աշխատում էինք իրար հետ, այդպես էլ աշխատում ենք»,- ասել է նա:

Պուտինը հավելել է, որ նախկին վարչապետի հետ ընկերական հարաբերություններ ունի: «Մենք միմյանցից գաղտնիքներ չունենք: Այդ պատճառով միասին ենք քննարկել կառավարության հրաժարականը: Նա տեղյակ էր, որ դա տեղի է ունենալու»,- նշել է նա:

ՌԴ նախագահը չի համաձայնել, որ Անվտանգության խորհրդի նախագահի տեղակալի պաշտոնը, որը ներկայումս զբաղեցնում է Դմիտրի Մեդվեդևը, հապշտապ է ստեղծվել: Ըստ նրա՝ նորմալ է, երբ նախ նշանակում է կատարվում, հետո՝ օրենք ընդունվում:

Հիշեցնենք, որ հունվարի 15-ին Ռուսաստանի կառավարությունը, վարչապետ Դմիտրի Մեդվեդևի գլխավորությամբ, հրաժարական տվեց: Նոր կառավարության ղեկավար նշանակվեց Միխայիլ Միշուստինը, իսկ Մեդվեդևը զբաղեցրեց Անվտանգության խորհրդի նախագահի տեղակալի պաշտոնը: