Սիրիայի խորհրդարանի բանաձևի երեք կարևոր կետերը

ՀՀ ԳԱԱ պատմության ինստիտուտի տնօրեն, ակադեմիկոս Աշոտ Մելքոնյանն իր ֆեյսբուքյան էջում անդրադարձել է Սիրիայի խորհրդարանի՝ Հայոց ցեղասպանությունը ճանաչող և դատապարտող բանաձևին և առանձնացրել երեք կարևոր կետեր։ Ակադեմիկոսը, մասնավորապես, նշել է.

«Սիրիայի խորհրդարանի բանաձևը կարևոր է երեք առումով։ Նախ՝ բանաձևում առկա է ,,Արևմտյան Հայաստան,, բառակապակցությունը, որը փաստում է նաև հայության հայրենազրկման հանգամանքը, որը կարևոր է տարածքային հատուցման խնդիրն առաջ տանելու համար։

Երկրորդ՝ Հայոց ցեղասպանությունը ճանաչվել է մի երկրում, որի տարածքում բնաջնջվել է տարագիր հայությունը՝ Դեր Զորում, Հալեպում, Ռաքքայում, Ռասուլ Այնում, Մարգադեում և այլուր, որի անմիջական վկան եղել են տեղի արաբները։

Երրորդ՝ Սիրիան Լիբանանից հետո Հայոց ցեղասպանությունը ճանաչած Միջին Արևելքի երկրորդ երկիրն է և զուտ իսլամական-արաբական առաջին պետությունը։ Դա կարող է ճանաչման հարցում ճանապարհ հարթել տարածաշրջանի մյուս պետությունների՝ Եգիպտոսի, Հորդանանի, Իրանի, Իրաքի համար։

Շնորհակալություն բոլոր նրանց, ովքեր կյանքի կոչեցին այս պատմական իրադարձությանը»,-գրել է Մելքոնյանը: