Ես այլատյաց չեմ. Միխայիլ Սաակաշվիլի

Վրաստանի երրորդ նախագահ Միխեիլ Սաակաշվիլին «Մթավարի» ալիքի եթերում հայտարարել է, որ ինքն այլատյաց չէ:

Խոսելով երկրի աղքատության մասին` նա նշել է, որ տնտեսական աճի դեպքում վրացի կանայք ստիպված չեն լինի Հունաստանում ծերերին խնամել, հայտնում է «Ալիք Մեդիան»:

«Թող ոչ ոք ինձ չմեղադրի այլատյացության մեջ, քանի որ դարեր շարունակ որևէ մեկին չի հաջողվել կոնսոլիդացնել Վրաստանի բազմազգ հանրությունը, իսկ ես դա արել եմ: Հարցրեք Վրաստանի ադրբեջանցիներին, հայերին, հրեաներին․․․ Ես այլատյաց չեմ, սակայն իսկապես չեմ ուզում, որ վրացի կանայք հույներին ծառայեն»,- ասել է Սաակաշվիլին:

Սա առաջին դեպքը չէ, երբ Սաակաշվիլիին մեղադրում են այլատյացության մեջ: Օրեր առաջ նա կորոնավիրուսի տարածման մասին խոսելիս ասել էր, որ Չինաստանի ոչ մի քաղաքացի Վրաստանի հողի վրա չպետք է ոտք դնի, քանի դեռ համաճարակային վտանգ կա: