Ադրբեջանը միայն Իլհամ Ալիևի հետ ունի պայծառ ապագա. Միխաիլ Սաակաշվիլի

«Կարծում եմ, որ Ադրբեջանը պայծառ ապագա ունի, քանի որ ունի իմաստուն և ուժեղ առաջնորդ, որը հասկանում է, որ երկիրը պետք է առաջ շարժվի»: Այս մասին haqqin.az-ի թղթակցի հետ բացառիկ զրույցի ժամանակ ասել է Վրաստանի նախկին նախագահ Միխաիլ Սաակաշվիլին, հայտնում է Yerkir.am-ը:

Սաակաշվիլին համոզված է, որ ուժեղ Ադրբեջանն ուժեղ Վրաստանն է, որը, ցավոք, Վրաստանում որոշ մարդիկ չեն հասկանում:

«Ոմանք չեն ցանկանում ճանաչել Ադրբեջանի հզորությունը: Բայց շուտով Վրաստանում ամեն ինչ կփոխվի, և մեր հարաբերությունները կզարգանան ավելի ինտենսիվ և կդառնան ավելի արգասաբեր», - վստահ է քաղաքական գործիչը:

Ինչ վերաբերում է Ադրբեջանում կայանալիք խորհրդարանական ընտրություններին, ապա Մ. Սահակաշվիլին ափսոսանքով խոստովանեց, որ վերջերս չէր հետևել ընկերական երկրում ընթացող ներքաղաքական գործընթացներին, բայց վստահություն հայտնեց, որ դրանք անցկացվելու են ժողովրդավարական և ազատ միջավայրում: 

«Ոչինչ իր տեղում չի մնում, և ես կասկած չունեմ, որ Ադրբեջանում ընտրությունները կշարունակեն նախագահ Իլհամ Ալիևի նախաձեռնած բարեփոխումները: Եվ, կրկին, Ադրբեջանի հաջողությունը Վրաստանի հաջողությունն է: Ես իսկապես հույս ունեմ, որ ընտրությունները կգնահատվեն բարձր գնահատականով », - նշել է Վրաստանի նախկին նախագահը: