Արցախում, Բաքվում և Սումգայիթում հայերի հետ տեղի ունեցածը չպետք է անպատիժ մնա. Քերոլայն Քոքս

Մեծ Բրիտանիայի Լորդերի պալատի նախկին անդամ և փոխխոսնակ, իրավապաշտպան, հայ ժողովրդի բարեկամ բարոնուհի Քերոլայն Քոքսը մասնակցել է երեկ՝ փետրվարի 5-ին Եվրախորհրդարանում ՀՅԴ Եվրոպայի Հայ Դատի նախաձեռնությամբ անցկացված «Մոռացված փախստականներ. Ի՞նչ է եղել Բաքվի հայերի հետ» խորագրով խորհրդաժողովին. հայտնում է Yerkir.am–ը:

«Ես ճանաչում եմ մարդկանց, որոնք Մեծ Բրիտանիա են փախել Բաքվի ջարդերի պատճառով: Հայերի ցեղասպանությունը շարունակվել է Բաքվում, Սումգայիթում ու Արցախում և դա պետք է ճանաչվի, որպեսզի այն չշարունակվի մնալ անպատիժ: Այդ տարիներին Ադրբեջանում իրավիճակը հեռու էր «ժողովրդավարությունից և թափանցիկությունից», ինչպես այսօր փորձում են ներկայացնել համաժողովի ադրբեջանցի մասնակիցները», - նշեց Քոքսը, ու հավելեց՝ ինքը հաճախ է տարատեսակ այցերով Արցախում գնում, ինչի պատճառով էլ այս պահին գտնվում է Ադրբեջանի «սև ցուցակում»:

Նշենք, որ բարոնուհի Քոքսը Արցախյան հակամարտության տարիներին բազմիցս է եղել Արցախում, իր աջակցությունն է հայտնել Արցախի հայ բնակչությանը և մայր Հայաստանին միավորման գաղափարին, տարբեր տեսակի օգնություն ցուցաբերել հայությանը: