«Զզվելի, ամոթալի ելույթ». Թրամփի ելույթն ու արձագանքները

ԱՄՆ նախագահ Դոնալդ Թրամփը ժամեր առաջ ԱՄՆ Կոնգրեսում ելույթ ունեցավ «Պետության դրության մասին» (State of Union) ամենամյա միջոցառմանը: Իր սկանդալային պահվածքով հայտնի ԱՄՆ նախագահն այս անգամ ևս «չհիասթափեցրեց» քննադատներին: Ավանդական ելույթի ժամանակ Թրամփը բազմիցս խախտել է միջոցառման ավանդույթները:

ԱՄՆ նախագահներն այդ միջոցառմանը ներկայացնում են երկրի ներքաղաքական և միջազգային դրությունը, անելիքներն ու կատարված քայլերը և պարտավոր են հետևել վաղուց ընդունված ավանդական կարգին:

Դրանցից մեկն իրենից ենթադրում է, որ ԱՄՆ նախագահը պետք է իր ելույթի տեքստը հանձնի Սենատի նախագահին (ԱՄՆ փոխնախագահ, հանրապետական Մայք Փենսին) և Ներկայացուցիչների պալատի խոսնակին (դեմոկրատ Նենսի Փելոսիին), որից հետո սեղմում է երկու պալատների ղեկավարների ձեռքը:

Թրամփը հանձնեց ելույթի տեքստը Սենատի երկու պալատների ղեկավարին: Դրանից հետո 80-ամյա Նենսի Փելոսին մեկնեց ձեռքը, սակայն Թրամփն  անտեսեց այն:  Իր հերթին ամենահարուստ կոնգրեսականներից մեկը համարվող Փելոսին Թրամփին ներկայացնելուց բավարարվեց «Կոնգրեսի անդամնե՛ր, ԱՄՆ նախագահ Դոնալդ Թրամփ» հայտարարությամբ, այնինչ ընդունված է, որ ՆՊ ղեկավարները Կոնգրեսի անդամներին դիմում են «Ինձ համար մեծ պատիվ է ներկայացնել ԱՄՆ նախագահին…» հայտարարությամբ:

Դրանից հետո հանրապետական սենատորները սկսում են վանկարկել «Եվս 4 տարի»՝ նկատի ունենալով նոյեմբերին նախատեսվող նախագահական ընտրությունները:

Փելոսին իր պահվածքը մեկնաբանում է այսպես. «Հաշվի առնելով այլընտրանքները՝ դա ամենաքաղաքավարի պահվածքն էր: Դա անպիտան, զզվելի ճառ էր», - ըստ Yerkir.am-ի՝ հայտարարել էր Փելոսին: Պետք է նաև ընդգծել, որ Փելոսին Թրամփի իմպիչմենտի «գլխավոր ճարտարապետներից» է:

Դեմոկրատ սենատորները նշում են, որ ելույթն ավելի շատ նման էր նախընտրական ճառի և «անընդհատ կրկնվում էր, որ ԱՄՆ-ն ավելի լավն է քան այս, քան այն պետությունը»: