Զարիֆը հրաժարվել է Դավոսի տնտեսական համաժողովին մասնակցությունից

Իրանի ԱԳ նախարար Մոհամմադ Ջավադ Զարիֆը հրաժարվել է Դավոսում Համաշխարհային տնտեսական համաժողովին մասնակցությունից. ըստ Yerkir.am-ի՝ այս մասին հայտարարել է երկրի արտաքին քաղաքականության գերատեսչության պաշտոնական ներկայացուցիչ Աբաս Մուսավին, պարզաբանում է ՏԱՍՍ-ը:

«Նախատեսված էր, որ Իրանի ԱԳՆ ղեկավարը մեկնելու է Շվեյցարիա՝ Դավոսում տնտեսական համաժողովին մասնակցելու համար,- մանրամասնել է նա ու հավելել,- չնայած պաշտոնական հրավերին, նա, սակայն, փոխել է իր ծրագիրը, հետևաբար այս ուղևորությունը չի կայանա»:

Միևնույն ժամանակ, սակայն, Մուսավին չի հստակեցրել Դավոս ուղեւորությունից Զարիֆի հրաժարվելու պատճառները:

Հիշեցնենք՝ հունվարի 21-24-ը Դավոսում տեղի է ունենալու 50-րդ հոբելյանական Համաշխարհային տնտեսական համաժողովը: Համաժողովի գործնական ծրագիրը մոտ 400 նստաշրջան է ունենալու, որոնց ժամանակ ելույթ է ունենալու ավելի քան 600 խոսնակ: