ՏԵՍԱՆՅՈՒԹ․ Ես չեմ պատրաստվում օգտվել վաղ կենսաթոշակի հնարավորությունից, որևէ բան չի կարող ինձ ճնշել․ Արևիկ Պետրոսյան

Ես չեմ պատրաստվում օգտվել վաղ կենսաթոշակի հնարավորությունից. ըստ Yerkir.am-ի՝ այս մասին այսօր՝ դեկտեմբերի 27-ին, լրագրողների հետ զրույցում ասաց Սահմանադրական դատարանի դատավոր Արևիկ Պետրոսյանը։

«Ես իմ կենսագրության յուրաքանչյուր էջը լրացրել եմ պատվով, պետականության ամրապնդմանը մասնակցելու բարձր պատասխանատվությամբ։ Ես չեմ պատրաստվում օգտվել վաղ կենսաթոշակի հնարավորությունից եւ հավատարիմ եմ մնալու ՍԴ դատավորի իմ տված երդմանը՝ լինել անկախ, անաչառ եւ իրականացնել Սահմանադրության գերակայության ապահովման իմ առաքելությունը»,- նշեց նա ու հավելեց. «Ճգնաժամ կլիներ, եթե չկարողանայինք նիստեր անցկացնել, որոշումներ կայացնել և մեր անգործության հետևանքով պետական իշխանության այլ մարմինների համար ստեղծեինք խնդիրներ: ՍԴ-ն առայսօր աշխատում է բնական հունով՝ խնդիր չունենալով որևէ նիստի քվորումն ապահովելու: Որևէ բան չի կարող ինձ ճնշել, ես հիմա ճնշվածի տպավորությո՞ւն եմ թողնում»,-ասել է նա:

Ավելի վաղ տեղեկեցարել էինք, որ այս պահին ՍԴ-ում ՀՔԾ ներկայացուցիչները քննում են ՍԴ նախագահ Հրայր Թովմասյանին: ՍԴ-ի բակում ընթանում է բողոքի ակցիա։

Հիշեցնենք, որ երեկ՝ դեկտեմբերի 26-ին, ՀՀ նախագահ Արմեն Սարգսյանը ստորագրել է «Սահմանադրական դատարանի մասին» սահմանադրական օրենքում լրացումներ կատարելու մասին, «Պաշտոնատար անձանց գործունեության ապահովման, սպասարկման եւ սոցիալական երաշխիքների մասին» օրենքում լրացում կատարելու մասին ՀՀ օրենքների փաթեթը՝ ՍԴ դատավորներին վաղ կենսաթոշակի ուղարկելու մասին։ Դրանից անմիջապես հետո ՀՔԾ քննիչները գնացել էին ՍԴ, սակայն պարզ չէ, թե ինչ նպատակով։

Ավելի ուշ տեղեկություն էր ստացվել, որ ՀՔԾ-ն եւս մեկ դրվագով լրացրել է ՍԴ նախագահ Հրայր Թովմասյանի սանիկ Նորայր Փանոսյանին առաջադրված մեղադրանքը և այդ հիմնավորմամբ դարձյալ դիմել դատարան՝ Փանոսյանին կրկին կալանավորելու համար։