Էրդողանի կուսակցությունը 4 ամսում լքել է 114 հազար անդամ

Թուրքիայի նախագահ Ռեջեփ Թայիփ Էրդողանի գլխավորած իշխող «Արդարություն և զարգացում» կուսակցությունից (AKP-ԱԶԿ) վերջին 4 ամսում հեռացել է շուրջ 114.000 անդամ. ըստ Yerkir.am-ի՝ հայտնում է t24.com.tr-ը:

Թուրքիայի հանրապետական դատախազության տվյալների համաձայն՝ հուլիսի 1-ից սեպտեմբերի 6-ը երկրի ամենամեծ քաղաքական կուսակցության (ԱԶԿ) շարքերից հեռացել է 56.260 անդամ, ևս 57.856-ը հեռացել է սեպտեմբերի 6-ից նոյեմբերի 22-ն ընկած հատվածում:

Հավելվում է՝ միևնույն ժամանակահատվածում անդամներ է կորցրել նաև խորհրդարանական  քրդամետ «Ժողովուրդների դեմոկրատական» կուսակցությունը (HDP-ԺԴԿ): Ընդդիմադիր ԺԴԿ-ի շարքերը լքել է 782 անդամ:

Այդուհանդերձ, լիովին հակառակ պատկերն է խորհրդարանական մյուս 2 ընդդիմադիր կուսակցությունների՝ ամենամեծ ընդդիմադիր «Ժողովրդահանրապետական» (CHP-ԺՀԿ) և «Լավ» կուսակցության (İYİ-ԼԿ) դեպքում:

Վերոհիշյալ ժամանակահատվածում ԺՀԿ-ի շարքերն ավելացել են 41 866, իսկ ԼԿ-ինը՝ 36139 անդամով: