Ռուսական հեռուստաընկերությամբ Քուրդիստանի քարտեզի ցուցադրումը զայրացրել է թուրքերին

Ռուսական պետական «Ռոսիա 1» հեռուստաընկերության ամենշաբաթյա հաղորդման ժամանակ ցուցադրվել է Մերձավոր Արևելքի տարածաշրջանային քարտեզը՝  քրդերի բաշխվածությամբ: Քարտեզի վրա քրդերի բնակեցրած վայրերը կրում էին Քուրդիստան անվանումը:

Թուրքական լրատվամիջոցներին բարկացրել էր այս փաստը: Նշել է, որ «ռուսական հեռուստաընկերությունը հաշվի չի առնում Թուրքիայի տարածքային ամբողջականությունը». հաղորդում է qha.com.tr կայքը:

Կայքն այս ամենը կապում է ՌԴ ԱԳՆ ղեկավար Սերգեյ Լավրովի՝ նոյեմբերի 1-ին «Ռոսիա 24»-ին տված հարցազրույցի հետ: Լավրովը Սիրիայի վերաբերյալ հայտարարություններում նշել է, որ «թուրքերը չեն կարող փախչել քրդական հարցից. Թուրքիայում մեծ թվով քրդեր են ապրում»:

Այդ հարցազրույցից հետո էլ «Ռոսիա 1»-ի ամենշաբաթյա հաղորդման ժամանակ է ցուցադրվել այդ քարտեզը: Բացի Թուրքիայից՝ Քուրդիստանի տարածքն ընդգրկել է Սիրիան, Իրանն ու Իրաքը: Ըստ կայքի՝ Ռուսաստանը Սիրիայում երկակի խաղ է խաղում: