Թուրքիայի դեմ նոր պատժամիջոցները պատրաստ սպասում են. Մնուչին

ԱՄՆ Ֆինանսների նախարար Սթիվ Մնուչինը հայտարարել է, որ Սիրիայում Թուրքիայի կողմից ձեռնարկված ռազմական գործողության հետևանքով Վաշինգտոնի՝ Թուրքիայի դեմ  պատժամիջոցների նոր փաթեթը պատրաստ պահվում է. հաղորդում է gazetekarinca.com կայքը:

Հոկտեմբերի 9-ին Թուրքիայի ձեռնարկած «Խաղաղության ակունք» ռազմական գործողության մեկնարկից հետո ԱՄՆ նախագահ Դոնալդ Թրամփը հայտարարել էր, որ պատրաստվում է Թուրքիայի դեմ մի շարք պատժամիջոցներ կիրառել՝ ոչնչացնելով Թուրքիայի տնտեսությունը, իսկ հրադադարի հաստատումից հետո հանել էր պատժամիջոցները:

Մնուչինն ասել է, որ, համենայն դեպս, նոր փաթեթը պատրաստ պահվում է, ապա՝ հավելել, որ դեռևս դրա կիրառման վերաբերյալ օրակարգ չկա: «Անհրաժեշտ պատժամիջոցները պատրաստ են կիրառման համար: Սակայն նախագահ Թրամփը գոհ է Սիրիայի հրադադարից: Չի կարծում, որ նոր պատժամիջոցների կարիք կա»,- նշել է նախարարը:

Չորեքշաբթի Ներկայացուցիչների պալատը 403 կողմ, 16 դեմ ձայներով ընդունեց Թուրքիայի նկատմամբ պատժամիջոցների փաթեթը: