ԵԱՏՄ-Սինգապուր համագործակցության փորձը կարող է կիրառվել մյուս երկրների դեպքում. Տիգրան Սարգսյան

ԵԱՏՄ-ն հայտ է ստացել Իսրայելից ազատ առևտրի տնտեսական գոտու ձևավորման շուրջ բանակցություններ անցկացնելու համար:  Եվրասիական տնտեսական հանձնաժողովի կոլեգիայի նախագահ Տիգրան Սարգսյանը Եվրասիական տնտեսական բարձրագույն խորհրդի նիստից հետո հրավիրված ասուլիսում նշեց, որ Իսրայելը դիտարկում է, որ վերջնական տեսքով այն լինելու է համալիր փաստաթուղթ:

«Այսինքն, այդ փաստաթղթում խոսք կգնա ոչ միայն գների, ապրանքների ազատ տեղաշարժի մասին, այլև ներդրումների ու ծառայությունների: Այն ֆորմատով, ինչը մենք ներկայում իրականացնում ենք Սինգապուրի հետ: Մենք կարծում ենք, որ այս մոտեցումը լավ օրինակ է, և Սինգապուրն այդ համատեքստում առաջին երկիրն է: Հույս ունենք այդ փորձը շարունակել առաջիկայում ևս»,- «Արմենպրես»-ի հաղորդմամբ՝ ասաց Տիգրան Սարգսյանը:

ԵԱՏՄ Բարձրագույն խորհրդի նեղ կազմով նիստին մասնակցել են ԵԱՏՄ անդամ երկրների ղեկավարները՝ Հայաստանի վարչապետ Նիկոլ Փաշինյանը, Ռուսաստանի Դաշնության նախագահ Վլադիմիր Պուտինը, Բելառուսի նախագահ Ալեքսանդր Լուկաշենկոն, Ղրղզստանի Հանրապետության նախագահ Սոորոնբայ Ժեենբեկովը, Ղազախստանի Հանրապետության նախագահ Կասիմ Ժոմարտ-Տոկաևը և Եվրասիական տնտեսական հանձնաժողովի կոլեգիայի նախագահ Տիգրան Սարգսյանը:

Ընդլայնված կազմով նիստին՝ հրավիրյալ երկրի ղեկավարի կարգավիճակով մասնակցում են նաև Իրանի նախագահ Հասան Ռոհանին, Սինգապուրի Հանրապետության վարչապետ Լի Սյեն Լուն: Մոլդովայի նախագահ Իգոր Դոդոնը նիստին ներկա է՝ որպես դիտորդի կարգավիճակում գտնվող երկրի ղեկավար:

Նիստում քննարկվել է ԵԱՏՄ 2018թ. բյուջեի կատարողականը, ԵԱՏՄ 2020թ. բյուջեն, ԵԱՏՄ միասնական ֆինանսական շուկայի կազմավորման հայեցակարգը, ԵԱՏՄ ներքին մի շարք փոփոխություններ և Բարձրագույն խորհրդի հաջորդ նիստի անցկացման վայրը:

2019 թվականին ԵԱՏՄ-ում նախագահում է Հայաստանը: